Andrej Dźmitranok. Radyjochvala
Jon pisaŭ joj tak šmat, što ažno nadakučyŭ. Nie doŭha dumajučy, jana pieratvaryła jaho ŭ radyjoprymač. Ciapier, kali jon nazalaŭ svaimi «bu-bu-bu», jana mahła jaho prosta vyklučyć ci lohkim rucham ruki znajści pryjemnuju muzyku i dalej zajmacca svaimi spravami. Jon vielmi lubiŭ usio źviazanaje z radyjo, i tamu spačatku novaja rola jamu spadabałasia, ale vielmi chutka abrydła. Čysty dub, chramavanyja rezistary huku i tembru — u śviatle tranzistarnych lampaŭ jon vyhladaŭ nastalhična pryhoža. Kinuŭ usio, pieratvaryŭ siabie ŭ radyjochvalu i pajšoŭ hulać pa častotach.
Š-š-šš
645LW — Radio Clarin, dalokaja Arhiencina, biaskrajnija pampy, stejk, dyktar čytaje Kartasara: «Tak, Paryž — mietafara. Što za malunak na hetym dyvanie? Ach, skradzienaje dziacinstva, a što ž jašče, što ž jašče! Ja dvaccać razoŭ byvaŭ u hetym pakoi i całkam nie zdolny ŭzhadać malunak na hetym dyvanie».
Š-š-ššš
1532LM — Radio Helderberg, Paŭdniovaja Afryka, prablemy mihracyi ptušak, aparteid, dobry čyrvony «Šyraz» 1975 hoda.
Š-š-š
708AM — PacifaBeat, načny efir aŭstralijskaha radyjo.
Chutka jon viedaŭ usie movy śvietu, skačučy praz kantynienty bieź vizaŭ i nadhladu ŭ aeraportach — jaho noč ustupała ŭ nierazborlivyja suviazi z dniom.
Jana nie viedała, što jon pierastaŭ być radyjoprymačom. Ranicoj, dniom, uviečary, pad čužyja razmovy i dobruju muzyku jana lubiła tančyć pobač z draŭlanaju skryniaj i vycirać pył — spakojnaj, što pobač byŭ jon. Kab moh, jon by paviedamiŭ, tolki bolš nie pisaŭ. Z vandrovak dasyłaŭ pryhožyja pieśni joj na FM i viartaŭsia nazad na siarednija i doŭhija chvali nazirać, jak tam źničkami adna za adnoj zmaŭkajuć u šumie efiru apošnija anałahavyja radyjostancyi.
Š-š-ššš
745AM — Califirnia Radio: «Z hetaha momantu słuchajcie nas u internecie».
Jon viedaŭ, što narešcie zastaniecca adzin u hetym šumie. Budzie samotna płyć u biezdani kosmasu byłych hałasoŭ i čakać, kali jana zaŭvažyć jaho nieprysutnaść. U šumie, što viečny, jak kosmas, jak viečny pył na radyjoprymačy.