Ci varta «Biełaj Rusi» mieć elektronnuju skryniu na mail.ru? Davydźka z Žukom zachaplalna abmiarkoŭvali heta ŭ «Kłubie redaktaraŭ»
Mahiloŭskaje haradskoje adździaleńnie «Biełaj Rusi» maje elektronnuju skryniu na rasijskim servisie Mail.ru. Fotapaviedamleńnie z takoj infarmacyjaj źjaviłasia ŭranicy 20 krasavika na sajcie «Našaj Nivy».
Čytajcie: «Biełaja Ruś» vykarystoŭvaje poštu na mail.ru FOTAFAKT
Uviečary taho ž dnia staršynia «Biełaj Rusi» Hienadź Davydźka vyrašyŭ abmierkavać hetuju prablemu ŭ svaim «Kłubie redaktaraŭ» u efiry «Biełaruś-1». Pryvodzim stenahramu razmovy.
Hienadź Davydźka: Chaču pracytavać vielmi niadrenny resurs, «Našu Nivu», jakaja apublikavała fatahrafiju biłborda, maleńkaha takoha rekłamnaha płakacika «Biełaj Rusi». Rasšyfrujcie, kalehi, u čym sens hetaj zaŭvahi? Ci heta ŭ rečyščy ŭvohule rusafobii? Što, ciapier usie, chto karystajucca poštaj na mejł.ru — dapuścim, ja, — heta patencyjnyja ruskija špijony? Ci što? Čamu heta navina raźmieščana na całkam užo salidnym resursie? Što hetym chacieli skazać? Uzbudzić kamientary?
Redaktar «Sovietskoj Biełoruśsii» Dźmitryj Žuk: Niama pra što pisać, ničoha bolš surjoznaha niama.
Hienadź Davydźka: Nie, niejki padkoł tut jość, ale ja nie razumieju, navošta. U čym navina, u čym złačynstva, u čym? «Aha, karystajecca čužym…»?
Redaktar «Sielskaj haziety» Siarhiej Michovič: Prosta pryncyp «čym horš, tym lepš». Treba prosta pryčapicca da słovaŭ.
Dźmitryj Žuk: «Čužym» ci «rasijskim»?
Hienadź Davydźka: To bok tady «Telehram» — nie?..
Dźmitryj Žuk (pierabivajučy): Hienadź Branisłavavič, «čužym» ci «rasijskim»? Bo ja ŭpeŭnieny, što ŭ hałoŭnaha redaktara [«Našaj Nivy»] — niavažna jaki telefon u jaho, ajfon ci sistemy android [nasamreč android — «NN»], jon karystajecca poštaj albo ajfonaŭskaj, albo džymejłam [pošta NN — nn@nn.by]. Jon što, ahient amierykanski taki?
Hienadź Davydźka: Ja zaraz pravieru vas, Dźmitryj Sanyč! (biare ŭ ruki «Sovietskuju Biełoruśsiju»). Tak, «SB. Biełaruś siońnia», adras elektronny, dzie jon tut?
Dźmitryj Žuk: Sb.by.
Hienadź Davydźka: Voś vy mnie ŭciorli nos zaraz! Sb.by… Chie-chie (śmiajecca) A pošta? Jość u vas dzie-niebudź na mail.ru?
Dźmitryj Žuk: Niama, taksama na Sb.by.
Kiraŭnik STB Ihar Łucki: Hienadź Branisłavavič, jany, napeŭna, chacieli skazać, što heta niepatryjatyčna.
Hienadź Davydźka: Nu heta budzie ŭsieahulnaje śviata, kali «Biełaja Ruś» piarojdzie na Belayarus.by?
Ihar Łucki: Heta budzie śviata dla «Našaj Nivy».
Hienadź Davydźka: Sajt u nas taki [Belayarus.by], ale na poštu nam pišuć na mail.ru… Nu ja, praŭda, nie baču tut niejkaha kryminału. Čamu heta stanovicca navinoj?
Siarhiej Michovič: Heta niejkija pieravahi, jakija ŭ kahości pavinny być.
Ihar Łucki: Lubiać jany vas!
Dźmitryj Žuk: Pa-pieršaje, heta nie navina. «Biełaja Ruś», vidać, karystajecca hetaj skryniaj 10 hadoŭ.
Hienadź Davydźka: Darečy, u «Narodnaj voli» pošta ŭvohule na gmail.com. To bok jak by amierykanskaja paštovaja sistema. Nu napeŭna, heta lepš za ruskuju dla tych, chto zmahajecca?
Siarhiej Michovič: Heta pa-pieršaje. A pa-druhoje, «Narodnaja vola» nie ŭvachodzić u śfieru intaresaŭ taho vydańnia, jakoje vy cytujecie. Jamu treba pahladzieć na «Biełuju Ruś», heta zadadzienaja meta.
Hienadź Davydźka: U čym maje aściarohi? Biełarusaŭ źbili ŭ Polščy za toje, što jany razmaŭlali na ruskaj movie. Ci nie pačnuć źbivać niejkich ludziej u nas u Biełarusi, tych, chto karystajecca rasijskimi infarmacyjnymi resursami, ci tych, chto hladzić rasijskaje telebačańnie? Dapuścim hańbujučy fakt na vybarach [budzie, kali] kandydat u deputaty… «Vy viedajecie, što jon hladzić rasijskaje telebačańnie?» — «O nie, ja nie budu za jaho hałasavać!» Da hetaha ŭsio idzie? Heta nie na kansalidacyju, nie na dabro!
Ihar Łucki: U susiedniaj krainie ŭsio tak i adbyłosia. Tamu vy absalutna majecie racyju.
Siarhiej Michovič: «U susiedniaj krainie» — heta va Ukrainie?
Ihar Łucki: Ja, kaniečnie ž, maju na ŭvazie Ukrainu. Ale ŭ nas i ruskaja, i biełaruskaja movy źjaŭlajucca dziaržaŭnymi, u nas Sajuznaja dziaržava z Rasijskaj Fiederacyjaj, tamu ŭsio heta pierakručvańnie faktaŭ. I žadańnie pasialić kanfrantacyju.
Hienadź Davydźka: Voś! Heta treba zaŭvažać i nie treba tak pakidać. Nu karystajucca i karystajucca. Kali ŭ hetym bačać niejkuju niepaŭnavartaść i ŭkazvajuć na heta… Mnie zdajecca, heta ŭžo maleńkaje, ale raspalvańnie, padšturchoŭvańnie da čahości.
Ihar Łucki: Heta nazyvajecca «mova varožaści». Heta mova varožaści. Toje, na što asabliva źviartajuć uvahu ŭ Jeŭropie, u zachodnich krainach. Voś takimi drobnymi krokami sutykajuć iłbami ludziej.
Hienadź Davydźka: Nu, spadziajusia, toje, što vy nazvali hetuju fatahrafiju na partale srodku masavaj kamunikacyi, nie budzie źjaŭlacca nahodaj padavać na vas niejkuju skarhu… Ale tym nie mienš ja taksama baču hetyja prykmiety… Usiaho vam dobraha!