Parłamient Danii zabaraniŭ chavać tvary ŭ hramadskich miescach
thelocal.dk
Parušalnikaŭ zabarony čakaje štraf da 10 tysiač kron. U Amnesty International novy zakon nazvali parušeńniem pravoŭ musulmanak.
Deputaty Falkietynha (parłamienta Danii) bolšaściu hałasoŭ (75 suprać 30) pryniali zakon, jaki zabaraniaje žycharam krainy i pryjezdžym nasić u hramadskich miescach hałaŭnyja ŭbory, jakija chavajuć tvary haspadaroŭ, paviedamlaje dackaja redakcyja partała The Local.
U adpaviednaści z zakonam, jaki ŭstupić u siłu z 1 žniŭnia 2018 hoda, na parušalnikaŭ zabarony buduć nakładacca štrafy. U pieršy raz suma štrafu składzie 1000 dackich kron (€ 134). Z kožnym novym parušeńniem zabarony štraf budzie pavialičvacca i moža vyraści da 10 tys. kron (€ 1,34 tys.). Pierad pryniaćciem zakona Dackaja narodnaja partyja (DNP) prapanoŭvała zrabić bolš žorstkim pakarańnie dla «recydyvistaŭ», zrabiŭšy mahčymym pryhavorvać ich da pazbaŭleńnia voli na termin da šaści miesiacaŭ, adnak u vyniku hetaja prapanova nie prajšła.
Pa dadzienych The Local, pryniaćcie zrobić niemahčymym našeńnie musulmankami parandžy, što całkam zakryvaje tvar (jana ž burka) i nikaba, što pakidaje tolki ščylinu dla vačej. Tym nie mienš, u samim zakonie nie havorycca, što jon nakiravany mienavita suprać našeńnia burak i nikabaŭ. Zabarona tyčycca lubych hałaŭnych uboraŭ, jakija chavajuć tvar, za vyklučeńniem tych, našeńnie jakich pradpisana zakanadaŭstvam Danii. Tak, naprykład, matacyklisty pa-raniejšamu pavinny buduć adziavać šlemy, nie aścierahajučysia taho, što ich pryciahnuć za heta da adkaznaści.