Pieraadkryjcie dla siabie kabačok: śviežy letni piroh RECEPT
Ja zaŭsiody ličyła kabačok prymityŭnaj harodninaj. Što ź jaho zhatuješ, akramia aładak? Ale apošnim časam jon pačaŭ raskryvacca dla mianie jak inhredyjent, jaki vielmi dobra siabruje ź inšymi praduktami i nadaje stravam śviežaść.
Siońnia padzialusia z vami receptam piraha z kabačkom i syram fieta. Tak, my budziem užyvać jašče šmat roznych inhredyjentaŭ, ale mienavita jany dapamahajuć kabačku raskrycca. Vy možacie apuścić niekatoryja składniki (naprykład, nie rabić kryšyva), ale raju vam pasprabavać zrabić pieršy raz mienavita pa hetym recepcie. Asablivy smak tut nadaje limonnaja cedra. Smačna jeści!
Piasočnaje ciesta:
- 100 hr. masła;
- 200 hr. muki;
- 1 jajka;
- 1/4 č. ł. soli.
Chałodnaje masła narezać kavałkami, dadać muku i sol, źmiašać. Dadać uźbitaje jajka i stałovuju łyžku chałodnaj vady i vymiesić hładkaje ciesta. Abharnuć plonkaj i pakinuć u chaładzilniku na paŭhadziny.
Raskačać ciesta, pakłaści ŭ vyšmaravanuju masłam formu. Pry hetaj kolkaści inhredyjentaŭ pasuje forma dyjamietram 26 sm. Patykać ciesta videlcam, zapiakajcie biez načynki chvilin 10 pry 180 hradusach (možna vykłaści pierhamient z fasollu ci harocham na ciesta, kab jano nie źmianiła svajoj formy).
Zaliŭka dla piraha:
- 250 hr. niatłustaj śmiatany;
- 2 jajki;
- sol, pierac;
Źmiašać śmiatanu ź jajkami, dadać sol i pierac na smak. Takija składniki ciesta i zaliŭki možna vykarystoŭvać dla luboha salonaha načyńnia (hryby, cybula, brokali i h. d.).
Kryšyva z parmiezanu:
- 25 hr. masła;
- 25 hr. muki;
- 25 hr. parmiezanu (ci inšaha ćviordaha syru).
Nacierci parmiezan, źmiašać z mukoj i masłam, kab atrymałasia kryšyva.
Načynka:
- 1 kabačok (300—400 hr.)
- 100 hr. syru fieta;
- 1 zubčyk časnaku;
- cedra 1 limona;
- 2 st. ł. aleju.
Kabačok nacierci na bujnoj tarcy, pramaknuć papiarovym ručnikom, kab prybrać zališniuju vilhać. Narezany časnyk i cedru padsmažyć na alei, dadać kabačok i amal adrazu pryniać z ahniu. Sumieś astudzić i dadać fietu, raźmiatuju videlcam.
Na vypiečanaje ciesta pakłaści načynku, dadać zaliŭku. Zapiakać 20 chvilin pry 160 hradusach. Pasypać kryšyvam i pakinuć u duchoŭcy jašče na 10 chvilin, pavysiŭšy tempieraturu da 180.