«Pryvid Danbasa błukaje pa Biełarusi»: Jak u Rasii interpretavali słovy Łukašenki pra stratu niezaležnaści
U Rasii nie pakinuli niezaŭvažanaj zajavu Alaksandra Łukašenki pra mahčymuju stratu Biełaruśsiu niezaležnaści, jakuju jon zrabiŭ 22 červienia padčas narady ŭ Škłoŭskim rajonie. «Naša Niva» zrabiła ahlad asnoŭnych publikacyj u rasijskich ŚMI na hetuju temu.
Kommiersant: Zajava Łukašenki — sproba vykazać svaju niezadavolenaść rasijskaj palitykaj
Alaksandr Łukašenka pradkazaŭ Biełarusi hibrydnuju vajnu i stratu suvierenitetu — heta zdarycca, kali miascovyja kiraŭniki buduć drenna pracavać biez uliku sučasnych realij. Heta nie pieršyja padobnyja zajavy biełaruskaha lidara. Jość mierkavańnie, što heta sposab vykazać svaju niezadavolenaść rasijskaj palitykaj. Palityčny ahladalnik «Kommiersant FM» Dźmitryj Dryze ličyć, što Łukašenka zaŭsiody tak ci inakš damahajecca svajho:
«Jon jak by naŭprost nie krytykuje starejšaha brata, chutčej namiakaje, ale pry hetym usim usio zrazumieła».
Rasijskaje vydańnie ličyć, što padobnyja zajavy — standartnaja praktyka dla Łukašenki, i pryčyna ich adna — kiraŭnik Biełarusi niezadavoleny, što Maskva nie ŭličvaje intaresy svajho chaŭruśnika i nie inviestuje naležnym čynam u jaje ekanomiku. U toj ža čas Kommiersant śćviardžaje, što za apošnija 11 hadoŭ Rasija ŭkłała ŭ Biełaruś $100 miljardaŭ.
«Kommiersant» ličyć, što Rasija, moža, i chacieła b dapamahać susiedu, prosta jana sama ŭžo nie takaja bahataja. Adnak Kreml usio adno budzie dapamahać Łukašenku (niachaj i ŭ mienšych abjomach), tamu što chaŭruśnikaŭ u Rasii amal nie zastałosia. Dy i adpuścić Biełaruś Maskva prosta nie zmoža, tamu što heta supiarečyć jaje palityčnym aryjenciram.
Ahladalnik rasijskaha vydańnia ličyć, što Łukašenka niazdolny na ekanamičnyja reformy. Uzhadvaje jon i toje, što Łukašenka nibyta pačaŭ zalacacca da «prazachodnich nacyjanalistaŭ», što taksama možna ličyć demaršam u bok Maskvy.
Life: Pryvid Danbasa błukaje pa Biełarusi
Adyjoznaje rasijskaje vydańnie miarkuje, što Łukašenka zaraz znachodzicca ŭ vostraj palityka-ekanamičnym schvatcy, i sihnały Łukašenka dasyłaŭ nie «niaščasnym biełaruskim kałhaśnikam», a źniešnim siłam.
Life piša, što Biełaruś užo daŭno admoviłasia ad budaŭnictva tak zvanaj «sajuznaj dziaržavy» z Rasijaj. Aŭtar nahadvaje pra abmiežavańnie vykarystańnia hieorhijeŭskaj stužki ŭ Biełarusi, historyju z «Nieśmiarotnym pałkom» u Minsku i toje, što ŭ Biełarusi nibyta pačali źmianiacca padručniki historyi. Heta ŭsio nahadała rasijskamu internet-tabłoidu padziei va Ukrainie.
«A adkaz na pytańnie, čamu raptam Łukašenka ŭzhadaŭ pra padziei na Danbasie i pačaŭ raspaviadać bajki pra niejki ŭnutrany «front» razam z razhojdvańniem majatnika nacyjanalizmu, prosty. Usia štuka ŭ tym, što ekanamičnaja madel «datacyjnaha psieŭdasacyjalizmu», jakuju Łukašenka i jaho asiarodździe budavali ŭ Biełarusi apošnija 24 hady, całkam pravaliłasia»,
— tłumačyć Life.
Rasijskaje vydańnie nahadvaje, što sacyjalna-ekanamičnaja madel Biełarusi bazavałasia na zachavańni stratnych i datacyjnych pradpryjemstvaŭ, funkcyjanavańnie jakich padtrymlivałasia hrašyma z Rasii.
U toj ža čas, adznačaje Life, «źniešniaja palityka Biełarusi pavodzić siabie ŭ lepšych tradycyjach dziaŭčyny lohkich pavodzinaŭ». Vydańnie nahadvaje, što Biełaruś nie tolki nie pryznała Krym rasijskim, ale i ŭdzielničaje va «Uschodnim partniorstvie», jakoje Life ličyć antyrasijskim prajektam.
«Rasii treba zajmać vyklučna cyničnuju pazicyju, jakaja zaklučajecca ŭ tym, što kali my i subsidujem kahości, adkryvajem svaje rynki i hetak dalej, to krainy, jakija atrymlivajuć takija prefierencyi, pavinny prytrymlivacca našaj źniešniaj palityki. I kropka»,
— piša Life.
News.ru: Rasija dziejničaje jak słon u pasudnaj kramie
Partał miarkuje, što rasijskija ŭłady sami nie razumiejuć, jakich adnosin jany chočuć ź Biełaruśsiu. Kali Rasija choča sapraŭdy braterskich i sajuznych adnosin, to za ich treba płacić:
«Bieskaryślivaje siabroŭstva, mahčyma, isnuje pamiž asobnymi ludźmi, ale jaho nie moža być pamiž krainami, chaj navat susiednimi, jakija majuć doŭhuju ahulnuju historyju».
Siarod «bonusaŭ» za siabroŭstva rasijskaje vydańnie nazyvaje zakryćcio pahraničnaj zony, źnižeńnie cen na enierhanośbity da ahulnarasijskich, vydaču lhotnych kredytaŭ:
«Dziejničajučy jak słon u pasudnaj kramie, my prymušajem Łukašenku ŭsio bolš aktyŭna šukać razumieńnia na Zachadzie».
Siabra Rady pa mižnacyjanalnych adnosinach pry prezidencie Rasii: Słovy Łukašenki charaktaryzujuć situacyju ŭ biełaruskaj ekanomicy
Siabra Rady pa mižnacyjanalnych adnosinach pry prezidencie Rasii Bahdan Biazpalka ŭ kamientary «FAN» adznačyŭ, što padobnaha rodu emacyjnyja vykazvańni charakternyja dla Alaksandra Łukašenki, ale hetyja słovy, na dumku ekśpierta, charaktaryzujuć i stan biełaruskaj ekanomiki.
«Słovy Łukašenki paćviardžajuć i vysokuju stupień zaležnaści biełaruskaj ekanomiki ad rasijskaj, a dakładniej, vysokuju stupień subsidziravańnia i datavańnia Rasijaj biełaruskaj ekanomiki praz pastaŭki tannaj biazmytnaj nafty, tannaha biaspošlinnaha hazu, kredyty, pradastaŭleńnie rynku zbytu i hetak dalej», — zaŭvažyŭ siabra Rady pa mižnacyjanalnych adnosinach pry prezidencie Rasii.
Na jaho dumku, słovy Łukašenki pra pahrozu ŭvachodžańnia Biełarusi ŭ skład «inšaj dziaržavy» pa sutnaści źjaŭlajucca pryznańniem taho faktu, što sama pa sabie Biełaruś nie moža spravicca z ekanamičnymi ciažkaściami.
Dźmitryj Bałkuniec: Zajava Łukašenki pakazvaje, da čaho pryviali krainu hady jaho kiravańnia
Palitołah Dźmitryj Bałkuniec u hutarcy z NSN patłumačyŭ, što zajava Łukašenki ab uvachodžańni Biełarusi ŭ inšuju dziaržavu — heta čarhovaja sproba streści hrošaj z Maskvy.
Ekśpiert miarkuje, što zajava Łukašenki dobra pakazvaje, da čaho pryviali krainu hady jaho kiravańnia. Praz 25 hadoŭ va ŭładzie Łukašenka praktyčna raśpisaŭsia ŭ tym, što ŭ Biełarusi jość surjoznyja ekanamičnyja prablemy, jakija biez vonkavaha finansavaha ŭździejańnia vyrašyć nie atrymajecca.
Kiraŭnik kamiteta pa spravach SND Dziaržaŭnaj dumy Rasii: Łukašenka pałochaje svaich čynoŭnikaŭ Rasijaj
Kiraŭnik kamiteta pa spravach SND Dziarždumy Rasii Kanstancin Zatulin miarkuje, što kiraŭnik Biełarusi ŭ svaim vykazvańni mieŭ na ŭvazie Rasiju:
«Jon pałochaje svaich čynoŭnikaŭ Rasijskaj Fiederacyjaj. Jon pałochaje tych ludziej, jakija ad jaho zaležać, tym, što pryjdzie Rasija, jak va Ukrainu, i stvoryć pahrozu vašamu dabrabytu. Jon užo nie raz raspaviadaŭ nam, što jon da apošniaha budzie abaraniacca ŭ akopie, u vypadku kali my zachočam niešta nakštałt taho, što adbyłosia ŭ Krymie, zrabić ź Biełaruśsiu».