Žychar Bresta kułakom pravieryŭ «dobry pres» siabra i trapiŭ pad sud
U Breście vynieśli prysud 19-hadovamu chłopcu, jakoha abvinavačvali ŭ pryčynieńni ciažkaha cialesnaha paškodžańnia svajmu pryjacielu.
16 maja kampanija maładych ludziej adpačyvała ŭ kvatery. Padčas zastolla adzin z haściej źniaŭ majku, ahaliŭšy svoj tors. Prysutnyja źviarnuli ŭvahu na «dobry pres». Adnak kamplimientaŭ paciarpiełamu było niedastatkova — i jon prapanavaŭ svajmu tavaryšu udaryć jaho ŭ žyvot, kab prademanstravać tryvałaść presa. Małady čałaviek admoviŭsia, ale spartsmien nastojvaŭ. Tady abvinavačany razmachnuŭsia i ŭdaryŭ u žyvot svajmu siabru. Toj udar vytrymaŭ, a zatym pajšoŭ spać. Nazaŭtra jon paprasiŭ siabroŭ vyklikać jamu chutkuju — miedyki dyjahnastavali ŭ paciarpiełaha razryŭ ścienki tonkaha kišečnika.
Śledčyja raspačali kryminalnuju spravu.
Na etapie rasśledavańnia i paźniej u sudzie paciarpieły nastojvaŭ, kab kryminalnuju spravu ŭ dačynieńni da jaho siabra spynili. Adnak u dadzienym kankretnym vypadku vyzvaleńnie ad kryminalnaj adkaznaści ŭ suviazi z prymireńniem bakoŭ było niemahčymym.
«Sud Maskoŭskaha rajona Bresta pryznaŭ 19-hadovaha žychara horada vinavatym u naŭmysnym naniasieńni ciažkaha cialesnaha paškodžańnia i pryznačyŭ 3 hady abmiežavańnia voli biez nakiravańnia ŭ vypraŭlenčuju ŭstanovu», — paviedamiła Tut.by staršy pamočnik prakurora horada Bresta Iryna Rubanava.
Prysud nie ŭstupiŭ u zakonnuju siłu i moža być abskardžany.