Alaksandra Hierasimienia raskazała, jak možna biaspłatna atrymać ziamlu ŭ Drazdach i stać susiedkaj Kačanavaj
«Našaj Nivie» stała viadoma, što znakamitaja biełaruskaja płaŭčycha, trochrazovaja alimpijskaja pryziorka Alaksandra Hierasimienia stała ŭłaśnicaj nadzieła ŭ Drazdach — prestyžnym rajonie Minska, dzie žyvie łukašenkaŭskaja elita.
Jana atrymała 15 sotak rašeńniem Minharvykankama №1358 ad 27 krasavika 2018 hoda.
Pakul što na ŭčastku Hierasimieni stajać bytoŭki budaŭnikoŭ susiedniaha ofisnaha centra. Praź niekalki miesiacaŭ jany źniknuć i možna budzie pačynać svaju budoŭlu.
Katedž spartsmienki ź ciaham času paŭstanie na ŭčastku źleva.
Najbližejšyja susiedzi Hierasimieni — kiraŭnica Administracyi prezidenta Natalla Kačanava i sakratar Rady biaśpieki Stanisłaŭ Zaś.
Košt ziamli ŭ hetym rajonie pačynajecca ad $400 tysiač za staruju chatu pad znos.
Jak Hierasimienia ŭmudryłasia atrymać tam nadzieł? Pra heta my spytalisia ŭ spartsmienki. Hierasimienia zapeŭniła «Našu Nivu», što dla jaje samoj heta niečakanaść.
«Ja pisała list u harvykankam, na imia prezidenta. Ja nie prasiła kankretna tam, prosta prasiła dać ziamlu. I dali. Dali biaspłatna, ale dakumientacyja, afarmleńnie — heta za naš košt. Ja nie ŭjaŭlała, što budzie tak», — raskazała Hierasimienia.
Jak joj susiedzi i što źbirajecca budavać?
«Z susiedziami jašče paznajomimsia. A budavać… nie viedaju, na što chopić srodkaŭ — toje i pabudujem», — skazała jana.
Taksama Hierasimienia dadała, što nie mieła spakusy pasprabavać pradać nadzieł.
«Ja lublu svoj horad. Chacieła dom, ale ja haradski čałaviek, za horadam mnie budzie ciažka, kali pradać i kupić niešta tam. A tut udałaje miesca, kab stvaryć utulny kutok», — reziumavała jana.
Paŭtara hoda tamu Alaksandra Hierasimienia razam z mužam Jaŭhienam Curkinym zajmieli prastornuju (bolš za 120 m2) čatyrochpakajoŭku ŭ navabudzie na vulicy Filimonava ŭ Minsku. Niadaŭna stała viadoma, što siamju čakaje papaŭnieńnie.
Pa słovach Hierasimieni, ciapier jaje čas zajmaje jaje prajekt «Sport-inkluzija», u ramkach jakoha jana ź vieraśnia płanuje pačać navučańnie dziaciej z aŭtyzmam płavańniu ŭ hrupach sa zvyčajnymi dziećmi.