Pamiatajecie maładuju mamu ŭ Vilejskim rajonie, jakaja pakinuła dačku byłomu mužu i źnikła? Jana try tydni chavałasia ŭ lesie
32-hadovaja Vieranika Baranava, jakuju milicyja šukała try tydni, znajšłasia ŭ svajoj vioscy ŭ Vilejskim rajonie, piša kraj.by
20 lipienia ŭ 23.00 milicyja razam z mužam Vieraniki znajšli žančynu ŭ chlavie ŭłasnaha dvara ŭ vioscy Malavičy. Matyŭ svajho ŭčynku jana rastłumačyć nie zmahła.
Nahadajem, što 28 červienia Vieranika Baranava sustrełasia z mužam, jaki žyvie ź inšaj žančynaj za 4 km ad jaje vioski, i pakinuła jamu ich ahulnuju 6-miesiačnuju dačku. Žančyna patłumačyła, što źbirajecca na abśledavańnie z-za surjoznaha zachvorvańnia, a sama pierastała vychodzić na suviaź. Pra jaje źniknieńnie ŭ milicyju zajaviŭ muž.
Pošuki praciahvalisia try tydni. Pieršyja 10 sutak supracoŭniki milicyi vyjazdžali na jaje pošuki štodnia. Šukali žančynu i ŭ vioscy, i ŭ lesie. 14 lipienia pa fakcie jaje źniknieńnia śledčyja raspačali kryminalnuju spravu.
— Padčas vyšukovych mierapryjemstvaŭ my rychtavalisia da najhoršaha. Nie vyklučali, što žančyna mahła zahinuć albo pakončyć z saboj. Na 12 lipienia płanavaŭsia maštabny pošuk pa pračesvańni lesu z udziełam 35 vajskoŭcaŭ unutranych vojsk MUS i vałancioraŭ «Anioł». Ale litaralna napiaredadni, 11 lipienia, źjaviłasia infarmacyja ab tym, što Vieranika žyvaja, viedaje, što jaje šukajuć, ale naŭmysna chavajecca. Miascovyja jaje nieadnarazova bačyli ŭ pasiołku Partyzanski, tamu z pošukavaj apieracyjaj my pačakali, ale praciahvali pošuki svaimi siłami, — raspavioŭ staršy ŭpaŭnavažany Vital Paśled.
20 lipienia padčas čarhovych pošukaŭ Vital Paśled razam z mužam Baranavaj ahledzieli niekalki apuściełych damoŭ u jaje vioscy, paśla pryjšli da jaje doma — dźviery byli začynieny, unutry nikoha. Zajšli ŭ chleŭ, tam muž znajšoŭ kurtku, jakuju, upeŭnieny, pakidaŭ u domie. Tut ža i znajšli žančynu — jana spała.
Rastłumačyć milicyi matyŭ svajho ŭčynku Vieranika nie zmahła. Adkazała łakanična: «Nie viedaju», kaža Vital Paśled.
Žančyna raspaviała, što ŭsie try tydni žyła ŭ lesie, siłkavałasia jahadami, načavała ŭ zakinutych damach abo čužych chlavach. 11 lipienia, pryznałasia jana, sapraŭdy źjaŭlałasia ŭ Partyzanskim, padyšła da dvara muža i jaho sužycielki, kab ubačyć dačku: u hety dzień dziaŭčyncy spoŭniłasia 6 miesiacaŭ.
Nie vyklučana, što žančynu turbavaŭ siamiejny razład: muž žyŭ ź inšaj žančynaj, i joj pryjšłosia ŭ adzinočku hadavać dzicia. Mahčyma, tak jana chacieła pryciahnuć da siabie ŭvahu abo viarnuć muža.
6-miesiačnaja dačka Vieranika pakul zastałasia z rodnym baćkam.