Rasija pahražaje litoŭskim hienprakuroram i sudździam
Jak pieradaje RIA «Novosti», Śledčy kamitet Rasijskaj Fiederacyi raspačaŭ spravu suprać hienprakuroraŭ i sudździ Litvy. Čynoŭnikaŭ inšaj dziaržavy padazrajuć u «pryciahnieńni nievinavatych da adkaznaści pa vynikach rasśledavańnia padziej u Vilni ŭ 1991 hod», paviedamiła aficyjnaja pradstaŭnica SK RF Śviatłana Piatrenka.
Z 2006 hoda słužbovymi asobami hienieralnaj prakuratury i suda Litoŭskaj Respubliki ažyćciaŭlajecca kryminalny pieraśled 60 byłych vajskoŭcaŭ Uzbrojenych Sił SSSR, značnaja častka jakich ciapier źjaŭlajecca hramadzianami Rasii.
«Zaviedzienaja kryminalnaja sprava ŭ dačynieńni da słužbovych asob hienieralnaj prakuratury i suda Litoŭskaj Respubliki. U ich dziejańniach bačacca prykmiety złačynstva, praduhledžanaha artykułam 299 KK RF «Pryciahnieńnie zaviedama nievinavataha da kryminalnaj adkaznaści», — paviedamiła Piatrenka.
Jana adznačyła, što prakuror departamienta pa rasśledavańni arhanizavanych złačynstvaŭ i karupcyi HP Litvy i inšyja słužbovyja asoby hetaha viedamstva vynieśli adpaviednyja pracesualnyja rašeńni ŭ dačynieńni da rasiejskich hramadzian, u adpaviednaści ź jakimi jany padazrajucca ŭ ździajśnieńni šerahu złačynstvaŭ u chodzie masavych biesparadkaŭ u horadzie Vilni ŭ studzieni 1991 hoda, padčas jakich, pa viersii litoŭskaha boku, pa vinie savieckich vajskoŭcaŭ zahinuli 14 čałaviek, bolš za 700 asobam naniesieny cialesnyja paškodžańni roznaj stupieni ciažkaści.
«Siarod inkryminavanych im dziejańniaŭ — stvareńnie i ŭdzieł u arhanizavanaj hrupie ŭ metach abmiežavańnia suvierennych paŭnamoctvaŭ Litoŭskaj dziaržavy, źviaržeńnia zakonna sfarmiravanaj ułady Litvy i stvareńnie pieraškodaŭ jaje pracy, a taksama ŭčynieńnie złačynstvaŭ suprać čałaviečnaści i vajennych złačynstvaŭ», — udakładniaje Piatrenka.
Sudździoj Vilenskaha haradskoha ŭčastkovaha suda na padstavie chadajnictvaŭ supracoŭnikaŭ litoŭskaj prakuratury byŭ sankcyjanavany zavočny aryšt rasijan, jany abvieščanyja ŭ vyšuk. U 2011 hodzie adzin ź ich — Michaił Hałavaty — byŭ zatrymany pa zapycie litoŭskaha boku na terytoryi Aŭstryi, adnak paźniej vyzvaleny ŭ suviazi ź nieabhruntavanaściu kryminalnaha pieraśledu, a ŭ 2014 hodzie druhi były vajskoviec SSSR Juryj Miel zatrymany i znachodzicca pad vartaj na terytoryi Litoŭskaj Respubliki. Adznačajecca, što ŭ ciapierašni čas materyjały rasśledavańnia razhladajucca pa sutnaści ŭ litoŭskim sudzie.