Siońnia BATE — «Zenit»
A 21:45 barysaŭski BATE praviadzie čaćviorty matč hrupavoha turniru Lihi čempijonaŭ suprać picierskaha «Zenitu». Dva tydni nazad hetyja kamandy na «Piatroŭskim» razyšlisia ź ničyjnym likam — 1:1.
Siońnia a 21:45 barysaŭski BATE praviadzie čaćviorty matč hrupavoha turniru Lihi čempijonaŭ suprać picierskaha «Zenitu». Dva tydni nazad hetyja kamandy na «Piatroŭskim» razyšlisia ź ničyjnym likam — 1:1. Na hoł našaha Pašy Niachajčyka naprykancy matču adkazaŭ turak Facich Tekie.
Kamanda «Hazpramu» rašuča nastrojenaja na revanš. Tuju ničyju rasiejskija žurnalisty rastłumačyli niešancavańniem svajoj kamandy i šalonym fartam barysaŭcaŭ. Trener «Zenitu» Dzik Advakaat na ŭčorašniaj pres‑kanferencyi zaznačyŭ, kali jahonaja kamanda stvoryć stolki ž momantaŭ, jak u Pieciarburzie, to pieramohu jana naŭrad upuścić.
Nastaŭnik BATE Viktar Hančarenka dyplamatyčna adznačaje, što jahony klub nia stavić nijakich zadač, a prosta nabirajecca dośviedu.
«Jak tolki my pačniom stavić niejkija zadačy, hulać na vynik, budzie našmat ciažej — na nas zvalicca dadatkovy psychalahičny hruz. Tamu my rychtujemsia spakojna i nia dumajem pra turnirnuju sytuacyju», — kaža V.Hančarenka.
Zrešty, paśla vydatnaj hulni ŭ Rasiei biełarusy čakajuć nia mienš natchnionaj hulni i ŭ Miensku. BATE hetaj vosieńniu pryvučyŭ nas da pryhožaj hulni. Chočacca vieryć, što siońnia budzie praciah.
Sumnievaŭ, što stadyjon viečaram budzie bitma niama. Naležnaja padtrymka zabiaśpiečanaja i «Zenitu». Pavodle papiarednich ličbaŭ u Biełaruś pryjechała kala 4 tysiač zaŭziataraŭ.
Dla tych, chto nie patrapić na stadyjon budzie žyvy efir na telekanale BT.