Siońnia va ŭsim śviecie ładzicca akcyja «Staniem za žurnalistyku!»
Inicyjataram akcyi vystupiła Mižnarodnaja federacyja žurnalistaŭ (IFJ). A ŭ biełaruskim ŽŽ prachodzić virtualnaja demanstracyja za svabodu słova ŭ Biełarusi.
Inicyjataram akcyi vystupiła Mižnarodnaja federacyja žurnalistaŭ (IFJ).
MFŽ zaklikała svaich partneraŭ i kalehaŭ pryśviacić nie tolki hety dzień, ale i ŭvieś tydzień z 3 pa 7 listapada baraćbie za pravy žurnalistaŭ, palapšeńnie ŭmovaŭ ich pracy, suprać palityčnaha i kamercyjnaha cisku na presu, a taksama i fizyčnaha hvałtu. Akcyja «Staniem za žurnalistyku» maje taksama zaśviedčyć rolu žurnalisckich arhanizacyjaŭ u spravie pavyšeńnia jakaści žurnalistyki.
Ciaham usiaho tydnia žurnalisty ładziać akcyi pratestu, siabroŭskija sustrečy, demanstracyi, jakija majuć pryciahnuć uvahu hramadzkaści da najbolš nadzionnych prablem žurnalistaŭ. «Abaraniajučy svaje ŭłasnyja pravy, žurnalisty taksama stajać za hramadzianskija svabody i fundamentalnyja pravy čałavieka», — havorycca na sajcie IFJ.
Tam ža raspaviadajecca, jakim čynam u jakich krainach žurnalisty dałučylisia albo tolki źbirajucca dałučycca da akcyi «Staniem za žurnalistyku!».
Naprykład, 4 listapada ŭ Brusieli ŭsie achvotnyja žurnalisty mahli pryjści i sfatahrafavacca razam z supracoŭnikami IFJ, Eŭrapiejskaj federacyi žurnalistaŭ (EFJ), Belhijskaj žurnalisckaj asacyjacyi, Eŭrapiejskaha žurnalisckaha centru, Mižnarodnaj asacyjacyja presy i inšych arhanizacyj. U Švejcaryi žurnalisckaja asacyjacyja Impressum napiaredadni akcyi vypuściła buklet na temu kalektyŭnaha pahadnieńnia i abarony aŭtarskich pravoŭ.
Siońnia ŭ Aŭstryi filija EFJ ładzić seminar dla maładych treneraŭ aŭstryjskich medyjakampanijaŭ. U Niamieččynie siońnia ranicaj filija EFJ zaprašaje ŭsich štatnych i pazaštatnych žurnalistaŭ sabracca ŭ ńjusrumie arhanizacyi, kab abmierkavać mahčymyja šlachi pavyšeńnia jakaści žurnalisckaj pracy.
U Charvatyi Nacyjanalnaja žurnalisckaja asacyjacyja planuje zładzić «kruhły stoł» na temu «Žurnalistyka — niebiaśpiečnaja prafesija».
U Francyi žurnalisty praviaduć demanstracyju «suprać prajektaŭ Nikala Sarkazi, jakija pahražajuć svabodzie presy».
U Italii žurnalisty vyjduć na demanstracyju dziela abarony svajho prava nie raskryvać krynic infarmacyi.
Biełaruskija žurnalisty taksama ŭdzielničajuć u akcyi. Napiaredadni HA «BAŽ», jakaja źjaŭlajecca asacyjavanyja siabram IFJ, raspaŭsiudziła zvarot da kalehaŭ i čytačoŭ «Razam staniem za žurnalistyku!», a taksama biełaruskamoŭny varyjant lahatypu kampanii dla raźmiaščeńnia ŭ biełaruskich ŚMI.
Siońnia pradstaŭniki HA «BAŽ» biaruć udzieł u kruhłym stale pa pytańniach prafesijnaj etyki.
U miežach kampanii «Staniem za žurnalistyku» ŭ biełaruskim ŽŽ prachodzić virtualnaja demanstracyja za svabodu słova ŭ Biełarusi.