Iharu Łučanku — 80
«Spadčyna», «Moj rodny kut», «Žuraŭli na Paleśsie laciać» — pieśni, muzyku dla jakich stvaryŭ Ihar Łučanok, časta ŭsprymajucca jak narodnyja. 6 žniŭnia kampazitaru, narodnamu artystu Biełarusi, spoŭniłasia 80 hadoŭ.
Ihar Łučanok naradziŭsia ŭ Marjinaj Horcy, u tvorčaj siamji. Pavodle słovaŭ kampazitara, jon viedaje svoj rod da dziasiataha kalena.
Baćka Łučanka, prafiesijny skrypač, byŭ artystam u Biełaruskim teatry Uładzisłava Hałubka, i tolki cudam paźbieh represij.
Svaimi hałoŭnymi tvorami Ihar Łučanok ličyć pieśni «Moj rodny kut» i «Spadčyna». Pieśni viadomyja kožnamu biełarusu, niekatoryja navat ličać ich narodnymi, jak i «Polku biełaruskuju».
Taksama Łučanok stvaryŭ šerah značnych akademičnych tvoraŭ, a jaho «Pieśniu pra Minsk» štodnia adbivajuć kuranty na Minskaj ratušy.
Taksama Ihar Łučanok — aŭtar adnoj ź pieršych rok-opier u SSSR. Heta «Huślar», na słovy Kupały, napisany supolna z «Pieśniarami».