Poł Manafort pryznany vinavatym pa vaśmi punktach abvinavačańnia
Rašeńnie prysiažnych nazyvajuć važnaj pieramohaj u raśśledavańni specprakurora Roberta Miulera, piša Radyjo Svaboda.
Členy žury prysiažnych u sudzie Aleksandryi (štat Virdžynija) pryznali byłoha kiraŭnika pieradvybarčaha štabu Donalda Trampa Poła Manaforta vinavatym pa 8 z 18 punktaŭ abvinavačańnia, uklučajučy piać punktaŭ, źviazanych z padatkovymi machinacyjami, dva — z parušeńniem bankaŭskaha zakanadaŭstva i adzin — z chavańniem rachunkaŭ u zamiežnych bankach. Manaforta abvinavačvajuć u padavańni padatkovym orhanam niepraŭdzivych źviestak ab dachodach i ŭ chavańni infarmacyi ab afšornych rachunkach.
Pa kožnym z vaśmi punktaŭ abvinavačańnia 69-hadovamu Manafortu pahražaje praciahły turemny termin. Hałoŭnaje pytańnie šmat dla kaho — ci pojdzie prezydent Tramp na toje, kab pamiłavać svajho byłoha pamočnika abo źmiakčyć jahony prysud. Taki krok moža mieć dla kiraŭnika Biełaha domu surjoznyja palityčnyja nastupstvy. Biez umiašańnia Trampa adzinaj nadziejaj na źmiakčeńnie verdyktu dla Manaforta zastajecca supracoŭnictva z kamandaj specprokurora Miulera.
Sprava Manaforta stała pieršaj u raśśledavańni Roberta Miulera, jakaja była pieradadzienaja ŭ sud. Specprakuror, jaki raśśleduje rasiejskaje ŭmiašańnie ŭ prezydenckija vybary ŭ ZŠA ŭ 2016 hodzie, vysunuŭ abvinavačańni suprać 32 čałaviek i damohsia 5 pryznalnych zajavaŭ.