U Minsku źjavicca skulptura pavodle tvoraŭ Puškina FOTA
Da Dnia horada na skryžavańni praśpiekta Puškina i vulicy Adojeŭskaha źjavicca skulpturnaja kampazicyja pavodle matyvaŭ tvoraŭ Puškina. Chto źjaŭlajecca jaje aŭtaram, za čyj košt jana stavicca i jak budzie vyhladać — u materyjale Tut.by.
Aŭtarami idei ŭstanoŭki pamiatnaha znaka źjaŭlajucca śpiavak i biźniesmien Siarhiej Nasko i skulptar Aleh Dziemidovič.
Jany pryjšli z hetaj prapanovaj da kiraŭnika Frunzienskaha rajona Arcioma Curana, jaki jaho padtrymaŭ. Materyjał zakupili na hrošy sponsaraŭ, a skulpturu zrabili na pradpryjemstvie Siarhieja Nasko. Da 6 vieraśnia kampazicyju pavinny pastavić, a pakul hladzicie, jak vyhladaje jaje pamienšanaja kopija z płastylinu.
Kampazicyja budzie ŭjaŭlać saboj bareljef ź lićciovaha marmuru, pafarbavanaha pad bronzu, na jakim pakazanyja hieroi ŭryŭka «U Łukamorja dub zialony». Vyšynioj bareljef budzie 1,6 mietra, šyrynioj — 1,4. Jon budzie nakładzieny na raśpiłavany kamień.
Siarhiej Nasko kaža, što na vytvorčaści skulptury jon ničoha nie zarablaje, a prosta choča zrabić padarunak rajonu, u jakim žyvie.
- Kryŭdna, što na praśpiekcie Puškina niama ničoha, źviazanaha z Puškinym. Da taho ž ciapier šmat dziaciej, jakija nie viedajuć, što takoje chatka na kurynych nožkach. Chaciełasia b, kab baćki zmahli padyści siudy i raskazać pra heta dzieciam. Kab patłumačyli: Alaksandra Siarhiejeviča možna i pačytać.
Paśla ŭstanoŭki skulpturu pieradaduć na bałans rajonnamu «Zielanbudu», jaki uładkuje prylehłuju da jaje placoŭku. Tut buduć novyja darožki, łaŭki i urny.