«Chacieŭ zabić i paranić maksimalna mahčymuju kolkaść ludziej»: rasijanina zatrymali ŭ Bierlinie za padrychtoŭku vybuchu
Hramadzianin Rasii zatrymany ŭ Bierlinie pa padazreńni ŭ padrychtoŭcy teraktu z prymianieńniem vybuchoŭki. Paviedamleńnie pra heta raźmieščana na sajcie hienprakuratury FRH.
Padazravanamu Mahamiedu-Ali S. 31 hod, palicyja praviała pieratrus u jaho kvatery.
Hienprakuratura udakładniaje, što zatrymany «padazrajecca ŭ padrychtoŭcy ciažkaha złačynstva suprać dziaržavy i złačynstva z vykarystańniem vybuchovych rečyvaŭ».
Rasśledavańnie źviazana z zatrymańniem u Francyi Klemienta B., aryštavanaha ŭ Marseli ŭ krasaviku 2017 hoda, havorycca ŭ paviedamleńni.
«U chodzie rasśledavańnia ŭ Francyi ŭźnikli padazreńni suprać Mahamieda-Ali S., jakija i pryviali da siońniašniaha aryštu», - udakładniaje hienprakuratura.
Śledčyja pryjšli da vysnovy, što Mahamied-Ali S. zachoŭvaŭ značnuju kolkaść vybuchovaha rečyva trycykłapieraksid acetonu (TATP) u kvatery ŭ Bierlinie.
Jon i Klemient B. mieli namier sabrać samarobnaje vybuchovaje prystasavańnie i pryvieści jaho ŭ dziejańnie ŭ Hiermanii, «kab zabić i paranić maksimalna mahčymuju kolkaść ludziej», udakładniaje prakuratura.
Adnak padrychtoŭka teraktu była sarvanaja ŭ kastryčniku 2016 hoda «previentyŭnymi» mierami palicyi, tamu złamyśniki padzialilisia - Mahamied-Ali S. zastaŭsia ŭ Bierlinie, a Klemient B. adpraviŭsia ŭ Francyju praź niamiecki horad Achien. Jaho aryštavali 18 krasavika 2017 hoda. Miescaznachodžańnie vybuchoŭki pravaachoŭnym orhanam nieviadoma.