Ciarpieć ci pić tabletku, kali niešta balić — tłumačyć doktar
Kožnaj dziaŭčynie znajomaja situacyja, kali niečakany rezki bol psuje ŭsie płany. Ranica cudoŭnaja: aśviažalny duš, lubimaja kava na bałkonie. 15 chvilin, jakija ŭ ciabie nichto nie adbiare. Ale tolki 15 chvilin, bo ludzi ciabie čakać nie buduć. I voś damyvaješ kubak i adčuvaješ, što ŭnizie žyvata niešta reža, što na iłbie prastupiŭ pot i naohuł — drenna.
Dumaješ, pajdu palažu chvilinku. Ale bol taki, što ty pryciskaješ padušku da žyvata i razumieješ: siońnia ciabie naŭrad ci chto dačakajecca. Dziaŭčatam dobra viadoma, jakimi balučymi mohuć być peŭnyja dni miesiačnaha cykłu, praź jakija davodzicca admaŭlacca ad zvykłaha ładu žyćcia.
Abo inšaja situacyja. Urvaŭ ty apošnija kvitki ŭ teatr na novuju pjesu, pra jakuju napisali ŭsie ŚMI, jakuju chvalać krytyki. Ale tak zdarajecca, što akurat pobač z taboj u zale hladzić śpiektakl pavažanaja dama, hustaja parfuma jakoj pastupova abvałakvaje susiedziaŭ pa kresłach. I praz paŭhadziny da ciabie dachodzić, što ty nie razumieješ słoŭ akcioraŭ, što daŭno zhubiłasia nić pjesy. A paśla ŭ antrakcie prosta nie možaš padtrymać ni z kim razmovu, vinavata ŭśmichaješsia i dumaješ tolki pra toje, što ŭ ciabie hałava hatovaja vybuchnuć ad pulsujučaha bolu.
Karotkačasovy bol uźnikaje niečakana, jaho nie sprahnazuješ i nie pieraniasieš na patrebny čas. Što ž rabić, kab płany nie admianialisia, a ŭražańni nie psavalisia?
My spytali pra heta ŭ doktara-nieŭrołaha miedycynskaha centra «Łade» Andreja Vysockaha. Parada jaho vielmi prostaja: «Bol tryvać nie treba. Lepiej vypić tabletku abiazbolvalnaha adrazu. Luby bol, kali ad jaho nie pazbavicca, jak tolki źjaviŭsia dyskamfort, viadzie da dalejšych spazmaŭ. Inšaja sprava, kali boli pastajannyja».
Kali hałaŭny bol źjaŭlajecca čaściej, čym raz na tydzień, to heta ŭžo tryvožny zvanočak, jaki patrabuje ŭvahi i abśledavańnia, kaža doktar.
«Najpierš treba źviarnuć uvahu na ranišnija boli, jakija supravadžajucca młosnaściu i vanitavańniem, asabliva tyja, jakija ŭzmacniajucca, kali vy lažycie, i krychu adstupajuć, kali padymajecie hałavu. Heta moža śviedčyć pra puchlinu hałaŭnoha mozhu. Heta zdarajecca ŭ 1% vypadkaŭ, ale naściarožanaść pavinna być».
Darečy, sa skarhami na hałaŭny bol źviartajucca da daktaroŭ amal usich śpiecyjalnaściej. «Niezdarma ž bolš za ŭsio charaktarystyk mienavita ŭ hałaŭnoha bolu. Jon byvaje i raśpirajučym, i ściskajučym, i stralajučym, i pulsujučym, i režučym, i kolučym, i śvidrujučym».
Dapamahčy ŭ lačeńni luboha z hetych vidaŭ bolu moža sam pacyjent. Jak? Pa-pieršaje, jak heta ni banalna, ale brać mienš prablem da hałavy.
«Voś čamu na hałaŭny bol čaściej pakutujuć žančyny? — pytajecca Andrej Vysocki. — Dy tamu, što žančyny bolš emacyjnyja, jany trymajuć u hałavie bieźlič zadač, prablem, čaściakom navat pustych pieražyvańniaŭ».
A dapamahčy sabie spravicca z hałaŭnym bolem dastatkova prosta.
Pa-pieršaje, varta naładzić režym snu. Kali ranicaj pračynaješsia badziory i adpačyły, to i hałaŭny bol nie daść znaku. Nie treba zmahacca sa stomlenaściu viodrami kavy, lepiej vyjści prahulacca i padychać śviežym pavietram. Kali vy pracujecie siedziačy, sačycie za śpinaj i čaściej mianiajcie pałažeńnie tułava, nie nachilajciesia nad papieraj ci kampjutaram. Kali adčuli niedamahańnie, možna zrabić samomu sabie masaž, pamasiravać akupunkturnyja kropki. Narešcie, pamierać cisk, bo bol moža źjavicca navat praź źmienu nadvorja.
Kab chutka źniać bol, doktar raić abirać tabletki ci paraški, jakija chutka zasvojvajucca. Efiekt jany dajuć užo praz 10-15 chvilin.
«Treba pamiatać, što ŭ vypadku pavieličeńnia kolkaści prystupaŭ hałaŭnoha bolu, źmieny jaho charaktaru, źjaŭleńnia novych simptomaŭ, raptoŭnaha mocnaha hałaŭnoha bolu, jaki supravadžajecca hałavakružeńniem, vanitavańniem, pavyšeńniem tempieratury, adsutnaści efiektu ad abiazbolvalnych srodkaŭ, nieabchodnaja kansultacyja śpiecyjalista dla svoječasovaj pastanoŭki dyjahnazu i pryznačeńnia lačeńnia», — źviartaje ŭvahu Andrej Vysocki.
Tabletki dajuć imhniennuju, ale časovuju palohku pry hałaŭnym boli. Kali ž nieabchodnyja bolš radykalnyja miery, to siońnia isnujuć mahčymaści prajści śpiecyjalnyja kursy, jakija dazvalajuć nadoŭha pazbavicca hetaj prablemy: kurs udarna-chvalavaj terapii (padobnaja da hłybokaha masažu), azonaterapii, łaziernaj terapii, ihłarefleksaterapii. Rajciesia z doktaram, jon zmoža vyznačyć, što patrebna mienavita vam.
«Nie žyvicie z hałaŭnym bolem, nie davajcie jamu admianiać vašy płany. Jaho možna i treba lačyć. I vy adčujecie, što ŭ žyćcia našmat bolš farbaŭ, čym vy dumali, uvieś čas kancentrujučysia na svaim boli», — dadaje doktar-nieŭrołah.