U Minsku pjany pacyjent sprabavaŭ źbiehčy z mašyny chutkaj i źbiŭ dziaŭčynu-fielčarku. A milicyja nie zmahła jaho znajści
U dačynieńni da 60-hadovaha minčuka raspačata kryminalnaja sprava ab chulihanstvie. Raniej supracoŭniki chutkaj skardzilisia tut.by: ich źbiŭ pacyjent, ale milicyja spyniła razhlad, bo mužčynu nie znajšli.
«U Minsku raspačata kryminalnaja sprava ŭ dačynieńni da 60-hadovaha minčuka», — raspaviali ŭ pres-słužbie viedamstva.
Za chulihanstva, pavodle č.1 art. 339 KK, pahražaje pakarańnie až da 3 hadoŭ pazbaŭleńnia voli. Akazałasia, u minułym mužčynu ŭžo niekalki razoŭ pryciahvali da kryminalnaj adkaznaści, u tym liku za chulihanstva. Zaraz dapytanaja paciarpiełaja miedyk i śviedka, vyvučajecca miedycynskaja dakumientacyja.
Nahadajem, 27 krasavika fielčary chutkaj dapamohi vyjechali pa vykliku na prypynak pa vulicy Čačota ŭ Minsku, adkul treba było zabrać pacyjenta. Pa darozie pjany mužčyna vyrašyŭ vyjści, a ŭ adkaz na zaŭvahu kinuŭsia z kułakami i pahrozami. Chutkaja pryjechała da budynka milicyi, adkul užo supracoŭniki dastavili mužčynu ŭ kajdankach u balnicu.
Paźniej adna ź miedykaŭ napisała zajavu na debašyra. Fielčar atrymała ČMT lohkaj stupieni i ŭdar hrudnoj kletki, a ŭ naparnicy paśla ŭdaraŭ zastaŭsia siniak na ściahnie.
Praz try miesiacy, u kancy lipienia, milicyja dała adkaz: sprava ab administracyjnym pravaparušeńni spyniena «ŭ suviazi ź nievyśviatleńniem miescaznachodžańnia asoby» (ukazana proźvišča, imia mužčyny) i zakančeńniem terminaŭ nakładańnia administracyjnaha spahnańnia.