Viera Burłak vydaje knihu dziciačych čytanak-vieršavanak
Vydaviectva «Halijafy» raspačało kraŭdfandynhavuju kampaniju pa zbory srodkaŭ na vydańnie dziciačaj knihi paetki-fantaziorki Viery Burłak.
Tut znojducca jak vieršavanki-čytanki na dabranač, tak i viasiołyja pračynanki-ŭstavanki. Bolšaść vieršaŭ lohkija dla zavučvańnia na pamiać.
Kniha aryjentavanaja na dziaciej ad 6 da 10 hadoŭ. Kožny, chto razumieje, jak redka apošnim časam źjaŭlajucca charošyja dziciačyja knihi, prosta musić źviarnuć uvahu na hetaje vydańnie.
«Fantaziurki» — heta jašče i praca dvuch najcikaviejšych mastakoŭ: Vieraniki Lemiešavaj i Andreja Pakroŭskaha. Žyvyja vieršy ź niejmaviernaj hulnioj słoŭ, a taksama viasiołyja hrafičnyja malunki, vieršavanki pra toje, što žyvie i znachodzicca pobač z nami, spałučeńnie vierahodnaha i nievierahodnaha — usio heta vy zmožacie znajści ŭ novaj knizie Viery Burłak!
Taksama ŭ miežach kraŭdfandynhavaj kampanii jość mahčymaść atrymać aryhinalnyja malunki ad Andreja Pakroŭskaha i sustrecca z aŭtarkaj dy mastakom za kavaj.
Bolš infarmacyi pra łoty hladzicie pa spasyłcy.
Viera Burłak pracuje vykładčycaj, piša vieršy i prozu. Jana vydała knihi «Za zdarovy ład žyćcia» (2003), «Zabi ŭ sabie Sakrata» (razam z mužam Viktaram Žybulem, 2008), «Tvory sonnaha žanru» (2011), «Dzieci i zdani» (2012). Pierakłała na biełaruskuju movu kazku Ljuisa Kerała «Skroź lusterka, i što ŭbačyła tam Alisa» (Halijafy, 2017). Haduje dvuch synoŭ.