20% kartaŭ palaka byli vydadzienyja z parušeńniem zakonu
Na praciahu apošnich 10 hadoŭ zajavu na atrymańnie karty palaka ahułam padali 220 tysiač čałaviek. Pra heta paviedamlaje Polskaje radyjo dla Biełarusi sa spasyłkaj na «Hazietu Vyborču».
Na asobach, jakija sprabujuć atrymać kartu palaka, nažyvajucca machlary i niekatoryja polskija arhanizacyi, jakija za 500—1500 dalaraŭ falsyfikujuć nieabchodnyja dakumenty. Na praciahu apošnich 10 hadoŭ zajavu na atrymańnie karty palaka ahułam skłali 220 tysiač čałaviek. Ź ich pałova — heta biełarusy i ŭkraincy.
Adnak, pavodle Vyšejšaj kantrolnaj pałaty Polščy, polskija konsulstvy na ŭschodzie nie spraŭlajucca z absłuhoŭvańniem takoj kolkaści zajavaŭ. Va Ŭkrainie i Biełarusi razmovy z konsułam treba čakać u siarednim niekalki miesiacaŭ. Vydańnie pisała pra cełuju systemu pasiarednikaŭ, jakija za hrošy znachodzili lepšyja terminy.
Pavodle Vyšejšaj kantrolnaj pałaty, hałoŭnaja pryčyna — kadravyja niedachopy. Paŭsiudnym źjaŭlajecca doŭhi termin razhladu dakumentaŭ. Zamiest zakonnaha miesiaca dakumenty razhladalisia bolš za paŭhoda. Try ź piaci konsulstvaŭ nie arhanizoŭvali konsulskich dziažurstvaŭ u miescach vialikaj kancentracyi palakaŭ, u suviazi z hetym dla niekatorych konsulstva było amal niedastupnym miescam — piša pałata.
Nie va ŭsich konsulstvach jość technika dla pravierki dakumentaŭ. Heta vykarystoŭvajuć machlary, jakija za adpaviednuju sumu falsyfikujuć dokazy polskaha pachodžańnia. Vyšejšaja kantrolnaja pałata padkreślivaje, što prablema falsyfikacyi dakumentaŭ surjoznaja. Sumnievy vyklikajuć taksama dakumenty, jakija vydajuć niekatoryja polskija arhanizacyi. Pra prablemu prodažu takich dakumentaŭ zajaŭlała konsulstva ŭ Astanie i Vińnicy.
U Astanie, Horadni, Vińnicy i Łucku kantralory śćvierdzili, što 20% rašeńniaŭ ab pryznańni karty palaka byli vydadzienyja z parušeńniem zakonu.