Deputat Marzaluk suprać zakona pra chatni hvałt: Budu baranić svaje tradycyjnyja kaštoŭnaści
Staršynia pastajannaj kamisii Pałaty pradstaŭnikoŭ pa adukacyi, kultury i navucy Ihar Marzaluk akreśliŭ svaju pazicyju nakont zakonaprajekta suprać chatniaha hvałtu: na jaho dumku, pryniaćcie novaha zakona moža naškodzić tradycyjnaj sistemie adnosin.
«Jość fundamientalnyja kaštoŭnaści, jakija ja padzialaju i budu baranić usimi fibrami svajho žyćcia, — cytuje Marzaluka infarmacyjnaje ahienctva BiełaPAN. — I jość rečy, na jakija ja nikoli kateharyčna nie pahadžusia. Kali my kažam pra sistemu tradycyjnych kaštoŭnaściaŭ, to jana nieadździelnaja ad chryścijanskaj tradycyi, tamu što jeŭrapiejskaść i chryścijanskaść u dobrym sensie — heta słovy-sinonimy».
Marzaluk ličyć, što kancepcyja zakona «Ab supraćdziejańni chatniamu hvałtu» supiarečyć biełaruskamu zakanadaŭstvu i niasie niebiaśpieku biełaruskamu hramadstvu. Čamu? Bo, naprykład, parušaje 32 artykuł Kanstytucyi ŭ častcy raŭnapraŭja muža i žonki ŭ siamiejnych adnosinach.
Fota Siarhieja Hudzilina.
Marzaluk taksama suprać taho, kab isnavała asobnaja adkaznaść za emacyjny i ekanamičny hvałt. Na jaho dumku, zakonaprajekt biazdumna skapijavali z zachodnich anałahaŭ: maŭlaŭ, adno z padraździaleńniaŭ MUS raspracavała jaho pry padtrymcy hłabalnych fondaŭ.
Nahadajem, u lipieni MUS vyniesła na abmierkavańnie kancepcyju prajekta zakona «Ab supraćdziejańni chatniamu hvałtu». Jaho raspracoŭvali na asnovie šmatlikich dakumientaŭ: dziejučych narmatyŭnych pravavych aktaŭ, navukovych daśledavańniaŭ, uličvali najlepšyja mietady supraćdziejańnia chatniamu hvałtu.
U kastryčniku dakumient płanujuć pieradaduć na razhlad Alaksandru Łukašenku. Zakonaprajekt uklučaje novyja paniaćci («ekanamičny hvałt», «pieraśled», «damahańnie»), u im pašyrany śpis tych, kaho možna budzie vinavacić u chatnim hvałcie, a taksama ŭvodzicca pramaja zabarona na bićcio dziaciej.
Raniej «Naša Nina» padrabiazna raskazvała pra 6 samych praryŭnych punktaŭ hetaha zakonapriekta.