Prysud pa spravie Alaksandra Koržyča abvieściać 5 listapada
Na pracesie ŭ spravie Koržyča skončylisia sprečki bakoŭ. Advakaty prosiać «jak maha mienšaha pakarańnia», piša Radyjo Svaboda.
Maci i babula Alaksandra Koržyča, fota Uładzia Hrydzina
18 kastryčnika na pracesie ŭ spravie śmierci Alaksandra Koržyča skončylisia sprečki bakoŭ. Prakuror i paciarpiełaja Śviatłana Koržyč vystupili napiaredadni, 18 kastryčnika vystupili advakaty paciarpiełaj i abvinavačanych.
Tak, advakatka Śviatłany Koržyč u svajoj pramovie źviarnuła ŭvahu na toje, što padčas razhladu spravy biez adkazaŭ zastałosia niekalki važnych pytańniaŭ. U pryvatnaści, sud tak i nia zmoh vyśvietlić, čyje hienetyčnyja ślady byli znojdzienyja na formie Koržyča (u ekspertyzie havorycca, što heta ślady niavyśvietlenych asobaŭ).
Taksama, na dumku advakatki Śviatłany Koržyč sud pavinien pryniać da ŭvahi pakazańni vajskovaha psychijatra Bubienčyk, jakaja adnaznačna zajaviła na dopycie, što nie zaŭvažyła ŭ Alaksandra Koržyča prykmietaŭ psychičnaha zachvorvańnia, a rasstrojstva, jakoje ŭ jaho było, nia moža być pryčynaj suicydalnych pavodzinaŭ.
Asobnaj uvahi, na dumku advakatki paciarpiełaj, zasłuhoŭvaje toj fakt, što śledčy eksperyment byŭ praviedzieny nia ŭ poŭnaj adpaviednaści sytuacyi, u jakoj znachodziŭsia Koržyč. Usim udzielnikam śledčych eksperymentaŭ było prademanstravanaje miesca paviešańnia i pastaŭlenaja zadača, u toj čas jak Alaksandar Koržyč trapiŭ u ventylacyjnaje padvalnaje pamiaškańnie samastojna i nia viedaŭ raniej pra jaho isnavańnie.
«Asobnaj uvahi zasłuhoŭvaje toj fakt, što zapalnička, jakuju nibyta vykarystoŭvaŭ Koržyč padčas samapaviešańnia, była znojdzienaja ŭ jaho kišeni», — zaŭvažyła advakatka Koržyč. U kancy svajoj pramovy jana adznačyła, što spadziajecca na spraviadlivaje rašeńnie sudu, a taksama na toje, što ŭsie vinavatyja ŭ śmierci Alaksandra Koržyča asoby buduć vyznačanyja