U Vilejskim rajonie padletki zakidali kamianiami ciahnik Minsk — Połack
U Vilejskim rajonie ŭviečary 10 listapada ŭ pasažyrski ciahnik padletki kinuli kamiani. Ciapier ich šukaje milicyja, piša kraj.by
Jak paviedamiła namieśnik načalnika Vilejskaha RAUS Kaciaryna Mlečko, u milicyju infarmacyja ab zdareńni pastupiła ŭ 18.50.
Mašynist pasažyrskaha ciahnika Minsk — Połack paviedamiŭ, što ŭ ciahnik nieviadomyja kinuli niekalki kamianioŭ. Prajazdžajučy prypynačny punkt «Zienit», u śviatle pražektara mašynist zaŭvažyŭ dvuch čałaviek, z vyhladu padletkaŭ. Jany znachodzilisia niepadalok ad čyhunačnych šlachoŭ.
Paśla hetaha praktyčna adrazu pačuŭsia charakterny huk. Kamiani nie patrapili ŭ vokny, tamu surjoznych paškodžańniaŭ nie zafiksavana. Niezapłanavanych prypynkaŭ u suviazi ź incydentam nie było.
Vilejski RAUS pravodzić pravierku. Supracoŭniki milicyi šukajuć złamyśnikaŭ. Pravavaja acenka zdareńniu jašče nie dadziena. Adnak havorka moža iści i ab kryminalnaj adkaznaści.