Padčas kancerta na ŭhodki Słuckaha paŭstańnia milicyja zapatrabavała ŭ muzykaŭ źniać maski
Fota: Aleś Dastanka, kurjer.info.
Kancert u Słuckim HDK, pryśviečany Dniu hierojaŭ, adznačyŭsia nievialikim zdareńniem. Adrazu paśla pieršaj pieśni hurta Zanzibar, viadučy paviedamiŭ - patelefanavali ź milicyi i skazali, što ŭdzielniki hrupy pavinny źniać maski, piša kurjer.info.
U hety dzień, 24 listapada, u Słucku vystupili salihorskaja «Charačakra», paet Andrej Chadanovič, minski hurt Zanzibar i lehienda biełaruskaha roku Lavon Volski. Mierapryjemstva sabrała kala 200 hledačoŭ. Heta byli słuččaki, hości ź Minska i Vilniusa.
Hrupa Zanzibar vystupaje ŭ maskach - taki jaje sceničny vobraz. I ledź skončylisia akordy pieršaj pieśni, Pavieł Śviardłoŭ, viadučy kancertu, pierapyniŭ vystup i abviaściŭ: «Pieršy raz na svajoj praktycy baču i čuju … nam patelefanavali ź milicyi i skazali, što nielha ŭ Słucku vystupać u maskach … Kali ŭ Słucku nielha vystupać u maskach… Kali ščyra, to ja dumaju, što treba zajčykaŭ, jakija pa płoščy chodziać, Dzieda Maroza, aryštavać,. lisičak».
Salist kamandy Zanzibar padziakavaŭ milicyi za kłopat i skazaŭ, što jany praciahnuć vystupić biez masak. Jon tolki paprasiŭ fatohrafaŭ i hledačoŭ: «Budziem udziačny, kali vy nie budziecie zdymać našy tvary».
Krychu paźniej, kali na scenu vyjšaŭ chedłajnier kancerta - Lavon Volski - chtości z zały paprasiŭ jaho źniać akulary. U adkaz na ździŭleńnie hladač rastłumačyŭ - u akularach vystupać taksama nielha, jak i ŭ maskach. Hetaje tłumačeńnie vyklikała ŭ zale śmiech.