Minsportu raskazała, kolki turystaŭ naviedali Biełaruś pa «biaźvizie»
Bolš za 179 tysiač turystaŭ skarystalisia biaźvizavym ujezdam u Biełaruś praz Nacyjanalny aeraport u Minsku. Pra heta padčas kruhłaha stała ŭ parłamiencie paviedamiŭ namieśnik ministra sportu i turyzmu Michaił Partnoj.
Bolš za ŭsio inšaziemcaŭ pa biaźvizavym ujeździe pryjechała za hety čas z Hiermanii — bolš za 28 tysiač, z Polščy — bolš za 16 tysiač, Italii — bolš za 15 tysiač, Vialikabrytanii i ZŠA — prykładna pa 12 tysiač.
U toj ža čas z Francyi bieź vizy pryjechali amal 8 tysiač turystaŭ, ź Niderłandaŭ i Łatvii — bolš za 6,4 tysiačy, Šviecyi — bolš za 6 tysiač, Litvy — bolš za 5 tysiač.
Z 12 lutaha 2017 hoda ŭ Biełarusi byŭ uviedzieny piacidzionny biaźvizavy režym dla hramadzian 80 krain, asnoŭnaja ŭmova — ujezd i vyjezd praz Nacyjanalny aeraport Minsk. Z 27 lipienia 2018 hoda «biaźviz» padoŭžany da 30 dzion. Praviła pracuje tolki dla tych, chto padarožničaje praz Nacyjanalny aeraport Minsk.
Biaźvizavym ujezdam u Hrodnie i biełaruskaj častcy Aŭhustoŭskaha kanała z kastryčnika 2016 hoda skarystalisia bolš za 134 tysiač turystaŭ. Biełaviežskuju pušču i turyscka-rekreacyjnuju zonu «Brest» sa studzienia hetaha hoda naviedała bolš za 15 tysiač čałaviek.