Čatyry akcyi salidarnaści ŭ stalicy na 16-ha
chronika apazicyi
Akcyi salidarnaści ź siemjami źnikłych ludziej prajšli 16 śniežnia ŭ roznych rajonach Minska.
Na Kastryčnickaj płoščy ŭ 18 hadzin siamiora členaŭ arhkamiteta pa stvareńni ruchu «Maładaja Biełaruś» stali z partretami palityka Juryja Zacharanki (źnik u mai 1999 hoda) i žurnalista Dźmitryja Zavadskaha (źnik u lipieni 2000 hoda). Praź niekalki chvilin jany byli vycieśnienyja z płoščy supracoŭnikami milicyi ŭ cyvilnym za Pałac Respubliki, a zatym da pierakryžavańnia vulic Janki Kupały i Internacyjanalnaj. Uvieś hety čas udzielniki išli z partretami źnikłych. Akcyja zaviaršyłasia biez zatrymańniaŭ.
U hety ž čas 25 pradstaŭnikoŭ zarehistravanaj u Čechii arhanizacyi «Małady front» stali z partretami źnikłych Viktara Hančara, Anatola Krasoŭskaha (źnikli ŭ vieraśni 1999 hoda), Ju.Zacharanki i D.Zavadskaha kala kinateatra «Biełaruś». Partrety visieli taksama na aharodžy ŭzdoŭž vulicy Haradski Vał razam z hirlandaj u vyhladzie nadpisu «My pamiatajem». Zatym maładyja ludzi pryjšli da kinateatra «Maskva», dzie stali z partretami, zapalenymi śviečkami i raściažkaj «Patrabujem mižnarodnaha rasśledavańnia vykradańniaŭ lideraŭ apazicyi». Supracoŭniki pravaachoŭnych orhanaŭ na akcyi nie prysutničali.
U 16 hadzin hetkaja ž akcyja salidarnaści prajšła na płoščy Jakuba Kołasa. Za raspaŭsiudžańnie ŭlotak ź infarmacyjaj pra źnikłych byŭ zatrymany aktyvist hramadzianskaj kampanii «Jeŭrapiejskaja Biełaruś» Juryj Plaškoŭ. Jon byŭ adpuščany praź dźvie hadziny biez składańnia pratakoła.
U 14 hadzin u studenckim haradku BDU padčas razdačy studentam ulotak ab źnikłych biełaruskich palitykach byli zatrymanyja aktyvisty arhkamiteta pa stvareńni ruchu «Maładaja Biełaruś» Artur Fińkievič, Aleś Ściepanienka, Valeryj Sakovič, Siarhiej Kastylenka i Aleh Kierol. Ich taksama adpuścili biez składańnia pratakołaŭ.
Dzień salidarnaści ź siemjami źnikłych palitykaŭ i represavanymi pa palityčnych matyvach biełaruskaja apazicyja pravodzić 16‑ha čysła kožnaha miesiaca pačynajučy z kastryčnika 2005 hoda.