Drazdovič, Sierhijevič, Sieŭruk i ŭsie‑ŭsie‑ŭsie
142 pracy zachodniebiełaruskich mastakoŭ vilenskaj škoły vystaŭlenyja ŭ Instytucie mastactvaznaŭstva, etnahrafii i falkłoru Nacyjanalnaj akademii navuk.
Michaś Sieŭruk. Kupalnicy
142 pracy zachodniebiełaruskich mastakoŭ vilenskaj škoły vystaŭlenyja ŭ Instytucie mastactvaznaŭstva, etnahrafii i falkłoru Nacyjanalnaj akademii navuk.
U Instytucie mastactvaznaŭstva, etnahrafii i falkłoru Nacyjanalnaj akademii navuk Biełarusi 16 śniežnia adkryłasia vystava ARS incognita, na jakoj demanstrujecca tvorčaść mastakoŭ Zachodniaj Biełarusi pieršaj pałovy XX stahodździa — vypusknikoŭ mastackich navučalnych ustanoŭ Vilni.
U ekspazicyi pradstaŭleny 142 raboty Jazepa Drazdoviča, Siarhieja Višnieŭskaha, Dźmitryja Kračkoŭskaha, Piatra Sierhijeviča, Michasia Sieŭruka, Vasila Sidaroviča i Paŭła Južyka.
Heta piejzažy, partrety, tematyčnyja karciny, eskizy rośpisaŭ chramaŭ, hraviury i raźba pa drevie, jakija zachoŭvajucca ŭ pryvatnych kalekcyjach.
Adkryvajučy vystavu, jaje kuratar Taćciana Haranskaja zaznačyła, što na praciahu apošnich hadoŭ tvorčaja hramadskaja arhanizacyja «Mastak» znajomiła minčan ź nieviadomymi tvorami zachodniebiełaruskaha mastactva. Pavodle jaje słoŭ, na hetuju temu ŭ kancy budučaha hoda praduhledžvajecca vydańnie manahrafii na biełaruskaj, litoŭskaj i polskaj movach, a taksama prezientacyja vystavy ARS incognita ŭ Vilni.
«Hałoŭnaja zadača vystavy ŭ tym, kab pryciahnuć uvahu ajčynnych muziejaŭ da tvorčaści mastakoŭ Zachodniaj Biełarusi. My imkniemsia da taho, kab raboty hetych majstroŭ, jakija zachoŭvajucca ŭ ich naščadkaŭ i kalekcyjanieraŭ, trapili ŭ fondy biełaruskich muziejaŭ», — padkreśliła T.Haranskaja. Pavodle jaje słoŭ, dahetul śpiecyjalistam nieviadomyja prykładna 90% tvoraŭ vyšejnazvanych majstroŭ.
Za pošuk, restaŭracyju i papularyzacyju tvorčaści mastakoŭ Zachodniaj Biełarusi, a taksama za padrychtoŭku ekspazicyi mastactvaznaŭca vykazała ŭdziačnaść doktaru fiłałahičnych navuk Arsieniu Lisu, mastakam Viktaru Markaŭcu, Iharu Barchatkovu i Ŭładzimiru Krukoŭskamu.
Pavodle słoŭ daradcy pasolstva Litvy ŭ Biełarusi Daryjusa Vitkaŭskasa, mastactva «znachodzić dastojnaje miesca ŭ litoŭska‑biełaruskich adnosinach», a taksama nadzieju na toje, što kultura «stanie mostam» supracoŭnictva i ŭniasie ŭ jaho «svaje farby i adcieńni».
Padčas viernisažu adbyŭsia kruhły stoł pa prablemach vyjaŭleńnia, muziejefikacyi, restaŭracyi i zachavańnia mastackaj spadčyny tvorcaŭ Zachodniaj Biełarusi.
Vystava pracuje da 25 śniežnia.
Adras: vuł. Surhanava, 1, korp. 2.