Hatujem buračnuju zakvasku i raskazvajem, što ź joj rabić
Šmatlikija viadomyja šef-kuchary śvietu nazyvajuć kulinarnym trendam apošnich hod pryhatavańnie ježy z dapamohaj fiermientacyi i zakisańnia. I voś što-što, a ŭ hetym biełaruskaja kuchnia moža usim słužyć prykładam, bo dla nas takija stravy jak kisłaja kapusta i kvas nie źjaŭlajucca čymści dziŭnym.
Ale voś na što my padzabylisia, dyk heta na zakvaski da supoŭ: žur (kisialica) i buračny zakvas dla baršču. Dla nas užo bolš naturalna padkiślać supy vocatam ci limonam.
Ščyra skazać, rabić zakvasku ŭ pieršy raz mnie było navat strašna: moža, ja zrablu štoś takoje, što zanadta zakiślicca i paškodzić zdaroŭju? Ale kali kiravacca prostymi praviłami jaje hatavańnia, usio atrymajecca! A boršč, zrobleny na buračnaj zakvascy, adździačyć vam niejmaviernym smakam.
Zakvasku možna zachoŭvać u takich voś butelečkach.
Siońnia ja raspaviadu vam, jak pryhatavać buračnuju zakvasku, a taksama paznajomlu ź cikavym supčykam, dzie jana vykarystoŭvajecca.
Na zakvasku:
- 500 mł vady;
- 0,5 č. ł. soli;
- 500 hr. burakoŭ;
- 3—4 zubčyka časnaku;
- 2 łaŭrovych lista;
- 3 ziarniatki duchmianaha piercu;
- 5 ziarniatak čornaha piercu;
- korań imbiercu (kavałak prykładna 1 sm) ci korań chrenu»
- 0,5 č. ł. kmienu;
- 0,5 č. ł. kalandry.
Kipiacim vadu, dadajom sol, pieramiešvajem i dajom sastyć. Buraki łupim, narazajem kavałkami. Časnok čyścim i trochi razdušvajem jaho nažom.
Dvuchlitrovy słoik abdajom kipniem, układajem u jaho burak, časnyk i śpiecyi, zalivajem salonaj vadoj. Važna, kab kavałki buraka byli pad vadoj (kali jany vydajucca, lepš ci prybrać častku, ci dalić vady). Na słoik pakłaści nakryŭku (nie zakručvać, a prosta pakłaści, kab byŭ vychad hazam).
Słoik pakidajem u ciopłym miescy na 5—7 dzion. Paśla druhoha dnia na pavierchni moža sabracca bieły šum — prybirajem jaho čystaj łyžkaj, jakuju abdali kipniem.
Na 5-ty dzień varta pakaštavać zakvasku: kali smak dastatkova kisły, to jaje možna vykarystoŭvać. Prybirajem z zakvaski buraki, prapuskajem jaje praz drušlak, pieralivajem u butelku i zachoŭvajem u ladoŭni (možna zachoŭvać niekalki tydniaŭ). Buraki z zakvaski možna vykarystoŭvać dla baršču ci, naprykład, buračnych katletak. Śpiecyi tut iduć jak dadatak dla bolš nasyčanaha smaku: vy možacie ci zrabić bieź ich ci pasprabavać dadać inšyja.
Boršč ź višniami:
- 750 mł bulonu z aharodniny;
- 250 mł buračnaj zakvaski;
- 1 burak (250 hr);
- 200 hr zamarožanaj višni biez kostak (razmarožvajem);
- 1 šklanka varanaha nutu (prykładna ¼ šklanki suchoha);
- sol, pierac;
- zielanina: piatruška ci krop.
Burak hatujem vašym ulubionym sposabam (mnie asabista padabajecca jaho zapiakać, jon tady bolš sałodki). Burak čyścim i trom na tarcy.
U rondali hrejem bulon z zakvaskaj, dadajem burak, varym chvilin 10 razam. Solim, pierčym. Dadajem višniu i nut, i dajem jašče chvilinak 7 pavarycca. Pierad padačaj pasypajem parezanaj zielaninaj. Smačna jeści!