Bieź Jahajły
Uchvaleny kančatkovy varyjant pomnika ŭ honar 1000-hodździa Bresta.
U Breście ŭchvaleny kančatkovy varyjant pomnika ŭ honar 1000-hodździa horada.Hetaje pytańnie razhladałasia 20 śniežnia na pasiadžeńni kaardynacyjnaha savieta pa zachavańni materyjalnaj i duchoŭnaj spadčyny pry Bresckim abłvykankamie.
Padčas abmierkavańnia
pradstaŭniki duchavienstva vykazalisia suprać uviekaviečańnia ŭ skulpturnaj kampazicyi adnoj ź siami histaryčnych asob — vialikaha kniazia litoŭskaha i karala polskaha karaleŭstva Jahajły.Jany ŭpeŭnienyja, što pieryjad praŭleńnia hetaha dziaržaŭnaha dziejača (kaniec XIV — pačatak XV stahodździa) aznamienavany ŭciskam ludziej pravasłaŭnaha vieravyznańnia. U jakaści arhumientu taksama pryvodzilisia źviestki,
što 80% žycharoŭ abłasnoha centra źjaŭlajucca pravasłaŭnymi.
Na pasiadžeńni byli pradstaŭleny i supraćlehłyja mierkavańni.
U pryvatnaści, što heta nie kultavy miemaryjał, a śviecki pomnik, jaki adlustroŭvaje asnoŭnyja viechi historyi Bresta.
Jahajła, jaki vydaŭ Biareściu hramatu na haradskoje samakiravańnie, hetak zvanaje Mahdeburhskaje prava, źjaŭlajecca znakavaj asobaj dla horada. Pradstaŭnikoŭ duchavienstva nie pierakanali pryviedzienyja arhumienty.
U vyniku ŭdzielnikami kaardynacyjnaha centra było ŭličana mierkavańnie pradstaŭnikoŭ BPC i pryniata rašeńnie źniać skulpturu Jahajły.
Heta ŭžo druhoje źmianieńnie, uniesienaje raspracoŭščykami pomnika pa prapanovie Biełaruskaj pravasłaŭnaj carkvy. Ciapier jaho zamiest Praśviatoj Baharodzicy (na dumku duchavienstva, prapanavanaja skulpturnaja vyjava Božaj Maci nie adpaviadała tradycyi Pravasłaŭnaj carkvy) viančaje anioł-apiakun horada z kryžam i miačom.
Jak zaznačyŭ u intervju BiełaPAN sakratar kaardynacyjnaha savieta pa zachavańni materyjalnaj i duchoŭnaj spadčyny pry Bresckim abłvykankamie Leanid Nieściarčuk, u chutkim časie budzie vyrablena rabočaja madel pomnika ŭ maštabie adzin da adnaho ad naturalnaj vieličyni.
Skulpturnaja kampazicyja raspracavanaja skulptaram Alaksiejem Paŭlučukom padčas padrychtoŭki horada da jubilejaŭ — 990-hodździa i 1000-hodździa z dnia ŭzhadvańnia Biareścia ŭ letapisnych krynicach. Svajo tysiačahodździe Brest adznačyć u 2019 hodzie.
Pomnik vyšynioj 10,5—11 mietraŭ z hranitu i bronzy budzie trochjarusnym. Na vierchnim — fihura anioła, na siarednim — šeść fihur histaryčnych asob, ustanoŭlenyja pa kruzie. Pomnik płanujecca ŭstanavić da 28 lipienia 2009 hoda na pierasiačeńni vulic Savieckaj i Hohala.