Trend na nieon: raskazvajem, jak dadać trochi rejvu ŭ štodzionnyja vobrazy z dapamohaj makijažu i aksiesuaraŭ
Nablizić viasnu i abstrahavacca ad zołkaj šeraści zimy nam zaŭsiody mohuć źlohku dapamahčy makijaž, pryčoski i adzieńnie. Vybirajučy jarkija kolery, vy padymajecie nastroj sabie i ŭsim, chto vas bačyć, navat kali heta nievialikaja detal u vašym vobrazie — pieraapranuŭšysia ŭ atrutna-aranžavy puchavik, vy chutčej staniecie padobnymi da darožnaha pracaŭnika ŭ sihnalnaj kamizelcy (choć kali heta vam padabajecca, čamu b i nie), a voś namalavaŭšy strełku hetaha adcieńnie, dadaścio trochi ekspresiŭnaści ŭ budni i vyhadna padkreślicie luby koler vačej.
Viadoma, navat samaha śmiełaha i adčajnaha bjuciholika moža spałochać ideja całkam pakryvać pavieki abo vusny dyskatečnym nieonam, ale, na ščaście, hety šalony koler možna «ŭbudavać» u štodzionnyja łuki i nie pierastaracca. My raskažam i pakažam jak!
Kalarovaja tuš
Samy prosty sposab dadać krychu rejvu štodzionnym vobrazam — vykarystoŭvać kalarovuju tuš. Husta pafarbujcie joju vierchnija i nižnija viejki, kali žadajecie maksimalna vyłučyć ich, abo dadajcie zusim troški tolki na končyki, kali vy tolki pačynajecie svajo padarožža pa čaroŭnym śviecie kreatyŭnaha makijažu. Vizažysty pa ŭsim śviecie lubiać stvarać taki mejk na podyum, tak što jon čas ad času milhaje ŭ repartažach z čarhovaha tydnia mody. Dzie ž znajści takuju tuš?
Na žal, u ajčynnych marak praduktaŭ jarkich koleraŭ nie vielmi šmat (heta abumoŭlena, viadoma, rentabielnaściu — siaredniestatystyčnaja biełaruskaja žančyna na žoŭtuju tuš pierachryścicca, heta my z vami — prahresiŭnaja moładź), ale znajści možna.
Cudoŭny varyjant — błakitnaja Luxvisage Secret, jakaja na lubych paviejkach, navat samych ciomnych, vyhladaje patrebny nam čynam. Z dastupnych u Biełarusi taksama raim źviarnuć uvahu na pradukty marki 3ina, jakija kaštujuć daražej, ale i vybar niestandartnych adcieńniaŭ tam značna šyrejšy.
Hieamietryja
Kisłotnyja kolery vydatna hladziacca, kali padadzieny ŭ prostych formach. Možna namalavać tłustuju liniju ŭ zmorščynie pavieka, robiačy adsyłku adnačasova da vobrazu Tvihi i psichadeličnych viečarynak 90-ch, ci pajhrać z formaj kłasičnych pryvyčnych strełak: naprykład, zrabić minimalistyčnuju «połuju» viersiju (pramalavać kontur, nie zapaŭniajučy koleram), ci pakinuć strełcy tolki chvościk, nie padvodziačy liniju rostu viejek — adnym słovam, pahuhliŭšy słovazłučeńnie graphic makeup, vy znojdziecie mnostva natchnialnych malunkaŭ.
Z praduktaŭ znoŭ rekamiendujem padvodki i kremavyja cieni marki 3ina, a taksama Nyx — u Minsku jość firmovyja kramy, dzie ŭsio heta dabro možna pratestavać i kančatkova vyrašyć dla siabie, ci padychodziać vam takija śmiełyja varyjanty.
Vusny
Čystaja, «vymyty» tvar plus nieonavaja pamada — kambinacyja, jakaja čas ad času viartajecca ŭ modu. Kali ŭvieś śviet — vaš podyum, i vy nie lubicie marnavać šmat času na makijaž, to hety ašałamlalny pryjom jakraz dla vas! Dastatkova prosta nanieści na tvar soncaachoŭny krem, źlohku rasčasać brovy, nafarbavać vusny pamadaj sakavitaha koleru (hrafična abo niadbajna, na vaš hust) — i vobraz u styli plažnaj viečarynki hatovy. Letam jon budzie aktualny jak nikoli, ale kali vam adčajna nie chapaje sonca i mora ŭžo zaraz, biarycie na ŭzbrajeńnie i vykarystoŭvajcie jak leki ad demisiezonnaj tuhi.
Jarkich pamadaŭ, na ščaście, dastatkova navat u biudžetnych sieryjach Alta Moda ad Relouis i Pin Up ad Luxvisage. Žyvy karał, darečy, jość u abodvuch vytvorcaŭ!
Paznohci
Kali vy nie lubicie makijaž abo pakul pabojvajeciesia vykarystoŭvać niešta adroznaje ad 50-ci adcieńniaŭ karyčnievaha, źviarnicie pilnuju ŭvahu na paznohci. Ich nafarbavać łajmavym abo elektryčnaja błakitnym niejak psichałahična praściej, tak što pačatkoŭcam rekamiendujem zrabić maleńkuju injekcyju jarkaści svajmu vobrazu mienavita pry dapamozie manikiuru. Da taho ž łaki dla paznohciaŭ u kožnaj kaśmietyčnaj kramie pradstaŭleny ŭ vielizarnaj kolkaści (u adroźnieńnie ad, naprykład, tych ža padvodak), padabrać patrebny koler niaciažka — kłasnyja jość navat u biełaruskich markach, naprykład, u Relouis u liniejkach Candy Bar i Like Gel.
A kali vy robicie manikiur ŭ sałonie, bonusam paradujecie svaju nejł-majstrychc, adciahvajučy jaje ad biaskoncych frenčaŭ.
Maleńkaja detal
Lepš mienš, dy lepš — u vypadku ź nieonam hetaja niazhrabnaja prykazka jak maha darečy. Luby łuk, navat ofisny, možna transfarmavać pry dapamozie jarkaha akcentu! Karystajciesia hetym, kali źbirajeciesia z karabla na bal paśla pracoŭnaha dnia — adpravicca na tusoŭku ź siabrami, naprykład. Sumka, abutak, chustka, piarścionak abo zavušnicy, remień, ramieńčyk dla hadzińnika — vybar aksesuaraŭ abmiežavany tolki vašymi pieravahami dy biudžetam.
Na błahi kaniec prosta nadzieńcie pad strohija štany škarpetki koleru vyrvivoka, i navat kali ich nichto nie bačyć, chaj vam padymaje nastroj toj fakt, što jany na vas nadzietyja. Pryčym raznastaić svoj styl vyjdzie zusim niadoraha, kali za bižuteryjaj adpravicca na Aliexpress, dzie možna za razumnyja hrošy znajści zusim fantastyčnyja štuki, a škarpetki, viadomyja ŭsiamu instahramu, kupić u luboj kramie pieradavoha Mark Formelle.
A vy hatovyja pajści na takuju advažnuju fešn-zajavu?