Hod «Lapisaŭ»
Rokiery viartajuć byłyja pazicyi, papsaviki pieraaryjentoŭvajucca na Zachad — muzyčnyja vyniki hodu sabraŭ Siarhiej Budkin.
Rokiery viartajuć byłyja pazicyi, papsaviki pieraaryjentoŭvajucca na Zachad — muzyčnyja vyniki hodu sabraŭ Siarhiej Budkin.
U 2008 hodzie šmat čaho ŭ biełaruskaj muzycy adbyłosia ŭpieršyniu. Vajciuškievič pajechaŭ na hastroli ŭ Japoniju, va ŭkrainskim Lvovie prajšoŭ biełaruski rok‑fiestyval, biełaruski dy‑džej uvajšoŭ u tuzin najlepšych u śviecie, hurt siaredniaviečnaj muzyki «Stary Olsa» pieršy raz vystupiŭ u Maskvie, i z anšłaham, a na pieśni biełaruskich muzykaŭ źniali stolki klipaŭ, kolki nie było za ŭsiu raniejšuju historyju… I ŭsio ž hod prajšoŭ pad znakam «Lapisaŭ» — ichnich kancertaŭ, ichnich piesień dy ichnich klipaŭ.
Pieśnia, albom, kancert, klip hodu
«Jaki jašče žest dobraj voli patrebny, kab nas pryznała biełaruskaja rok‑tusoŭka?», — kinuŭ Siarhiej Michałok u intervju na muzyčnym internet‑sajcie «Tuzin Hitoŭ». Vidać, trochi jaho zajeła, što hałoŭnuju Rok‑Karonu prysudzili hurtu Neuro Dubel. Mahčyma, tady ŭ jaho i naradziłasia pieśnia Belarus Freedom — rok‑himn, jaki daroŭnivaje «Partyzanskaj» Lavona Volskaha.
Praŭda, Michałok nie ryzyknuŭ jaje syhrać ni na solnym kancercie ŭ minskim Pałacy sportu, ni ŭ viciebskim amfiteatry. Novy albom «Manifiest» hurt vyrašyŭ raspaŭsiudzić biaspłatna praź internet, a potym užo vydać na dyskach (hetak ža zrabiŭ z svaim solnikam «Kuplety i prypievy» Lavon Volski). «Manifiest» uražvaje. Roŭnych «Lapisam», prynamsi pa technicy i padačy, u Biełarusi niama i blizka.
A paśla taho, jak uśled za «Kapitałam» Alaksiej Cierachaŭ zrabiŭ klip na pieśniu Michałka «Ohońki», stała jasna, što «Lapisam» niama roŭnych i tut — hetaja praca atrymała hałoŭny pryz u naminacyi «Najlepšaja animacyja» na feście muzyčnaha videa VIMUS u Partuhalii, apiaredziŭšy klipy The Chemical Brothers i Bjork. Videašerah pryjšoŭsia daspadoby i rasijskim kamunistam, jakija, nie spytaŭšy dazvołu, skarystali jaho ŭ prapahandysckim roliku dla sajtu partyi Ziuhanava, čym vyklikali spraviadlivy aŭtarski hnieŭ.
Masavaj vytvorčaściu klipaŭ dla biełaruskich vykanaŭcaŭ sioleta adznačyŭsia niezaležny telekanał «Biełsat». Za hod ich było zroblena niekalki dziesiatkaŭ. Niekatoryja ź ich navat pakazvali na płazmavych ekranach u minskim mietro. Pa BT, praŭda, jašče nie.
Zabarony źniali, bojaź zastałasia
2008 hod zapomnicca «Rok‑Karanacyjaj» ź bliskučaj pramovaj Uładzimiera Arłova pry ŭručeńni Karony Kulinkoviču. Kancertam «Salidarnyja ź Biełaruśsiu» ŭ centry Varšavy, adradžeńniem festu «Rok pa vakacyjach», startam prajektu «Rok‑škoła» dla maładych muzykaŭ i muzyčnaj misteryjaj «Dzień Maksima Bahdanoviča». Ech, zrabić by jaje jašče bolš zrazumiełaj dla masaŭ — łamilisia by pałacy ad hledačoŭ…
Sioleta na transpamiežnych fiestyvalach Be Free, be2gether, «Basovišča» jašče hučała teza pra «zabaronienych» muzykaŭ, ale ŭžo nie tak upeŭniena. U što ž vyliłasia «pahadnieńnie z djabłam», jak nazvała hazieta Sueddeutsche Zeitung vizit biełaruskich muzykaŭ u prezidenckuju administracyju? Hurty z «čornaha śpisu» — N.R.M. i Neuro Dubel, «Trojca» i «Pałac» — davali solnyja kancerty ŭ adzin dzień, Kulinkovič spakojna pačuvaŭ siabie na on‑łajn kanfierencyi «SB», a Chamienka staŭ milhać u televizary, što toj Cichanovič. N.R.M., darečy, byli adzinymi, chto navažyŭsia na ŭsiebiełaruski tur paśla źniaćcia ŭsich umoŭnych zabaronaŭ. Toje, što jechać u re¬hijony — niebiaśpiečna, paćvierdziŭ kancert hurtu Neuro Dubel u Mahilovie, admienieny praź nizki prodaž kvitkoŭ. «Dy na ich prosta zabylisia za tyja čatyry hady, što jany nie pryjazdžali», — tłumačyli mahiloŭskija rok‑entuzijasty.
Ale pa‑za kropkavaj libieralizacyjaj chapała sioleta i zvyčajnaha. Sudzili arhanizataraŭ kancertu Lombard u Hrodna, a ŭ Minsku byŭ sarvany kancert, pryśviečany Słuckamu zbrojnamu čynu i premija biełaruskaha muzyčnaha videa. Čynoŭniki pa‑raniejšamu zaścierahajucca biełaruskaha, fakt.
Sychod hodu: Vaškievič i Śviet
Sioleta jak minimum na dva talenavitych muzyki ŭ Biełarusi stała mieniej. Pajšoŭ z žyćcia Andrej Vaškievič — lider hurtu «Luboŭ i sport». Siabry‑rokiery arhanizavali dušeŭny kancert pamiaci i sabrali hrošaj siamji. Panios stratu biełaruski bluz. Zhinuŭ vialiki talent — Śviatasłaŭ Chadanovič, lider Svet Boogie Band.
Skandał hodu: Poł i Palina
Śpiavačka Palina Smołava zhańbiłasia pierad usim śvietam paśla sproby zrabić niemudrahielisty, ale efiektny pijar‑chod: maŭlaŭ, jana maje zaśpiavać ź lehiendarnym Połam Makartni (sumiesnaje fota prykładałasia). Soram uziaŭ, kali vyśvietliłasia, što toje fota — padrobka, a pradstaŭnik sera Poła zajaviŭ, što takoha nie było i być nie mahło.
Jon navat nie kazaŭ pra isnavańnie hetaha fota eks‑»Bitłu» — biaroh jaho niervy. Hetaja historyja taksama daje padstavy dla aptymizmu: u našych papsavikoŭ adbyłasia pieraaryjentacyja. Ciapieraka zusim nie modna siabravać z Kirkoravym ci vydavać albomy na firmie «Sojuz». Hulcy na poli biełaruskaha šou‑bizu pačali hladzieć na Zachad. Darafiejeva chvaliłasia na svaim sajcie, što vystupić z Džeksanam i Tymbierlejkam (praŭda, nie napisała, što toje dvajniki).
Pradziusier Uładzimir Maksimkaŭ raspaŭsiudziŭ svaju fotasiesiju, zroblenuju dla niamieckaha eratyčnaha časopisa (praŭda, takoha nie isnuje ŭ pryrodzie). Saładucha vuń dziela zbornaha kancertu našych estradnikaŭ u Varšavie vyrašyŭ pierakłaści svaju «Čužuju miłuju» (praŭda, na polskuju). Zavarušylisia. I heta nie tak užo i kiepska.
Byli sioleta i sapraŭdnyja praryvy na Zachad. Viciebski DJ 33, jon ža Valer Švyndzikaŭ, zaviecca ciapieraka dy‑džejem №11 u śviecie. Hety status jon atrymaŭ na DMC World DJ Championship — mierapryjemstvie suśvietnaha maštabu z bolš čym dvaccacihadovaj historyjaj, jakoje pravodzicca ŭ vielizarnym łondanskim kłubie Indigo2.
Prajekt hodu
Sioleta vyjšła paru cikavych składanak («NiezaležnyJa», «Basovišča», «Volnyja pieśni»), ale nie takoha kanceptualnaha ŭzroŭniu, jak prajekty raniejšych hadoŭ — kštałtu «Chatyni» ci «Śviatoha viečara».
Hierojami hodu stali biełaruskija žurnalisty. U 2008 hodzie paŭstaŭ šerah muzyčnych miedyjnych prajektaŭ. NETradio i radyjo «Racyja» tranślavali ŭžyvuju samyja cikavyja biełaruskija kancerty, a pieršaje dyk naohuł adkryła asobny kanał «100 pracentaŭ biełaruskaj muzyki» z farmatam «nieestrada». Žurnalist Źmicier Bieskaravajny stvaryŭ vielmi nieabchodny prajekt — Experty.by z muzyčnaj analitykaj, jakoj raniej nie stavała. Źmicier Padbiareski vydaŭ svaju «Encykłapiedyju biełaruskaj papularnaj muzyki». Hałoŭnym histaryčna‑muzyčnym prajektam hodu možna ličyć «Biełaruski andehraŭnd 1960‑70‑ch».
Viadoŭca radyjo «Junistar» Viktar Siamaška pieršym uziaŭsia za daśledavańnie historyi biełaruskaha roku i apisaŭ, jak u Biełarusi źjavilisia pieršyja elektrahitary, ładzilisia pieršyja kancerty i razhanialisia akcyi chipi. Svaju daśledčuju pracu jon padmacavaŭ apoviedami ŭdzielnikaŭ tych padziejaŭ, archiŭnymi zapisami dy fotazdymkami. Prahrama ŭ dzieviaci častkach vychodziła na radyjo «Junistar» i na «Tuzinie Hitoŭ», a potym navat źjaviłasia ŭ prodažy. Praŭda, tolki ŭ samvydataŭskim vyhladzie. Dzie vy, vydaŭcy?
Dvanaccać najlepšych piesień 2008 hodu
- 1. «AntiEMO (Parket)» — hurt «Hluki» (Mahiloŭ).
2. «Siańnia Kupała, zaŭtra Jan» — «Osimira» (Miensk).
3. «Zahinułym paetam pryśviačajecca» — :B:N: (Biaroza) i Lavon Volski.
4. «Nie vieru tabie» — Nevma (Mahiloŭ).
5. «Pidarasy» — Neuro Dubel
6. «Vosień» — hurt «Rokaš» (Minsk)
7. Čaroŭny mur — TerminX (Minsk).
8. «Biełaja ptuška» — Taćciana Biełanohaja.
9. «Kałychanka» — «Ściana» (Brest).
10. «Try janhały» — «Troica».
11. «Synu» — ILO & Friends (Biełastok)
12. «Zorka Vieniera» — J:Mors.