Hanna Sieviaryniec. Razvahi paśla intelektualnaha kłuba
Karaciej, siadzieła ja ŭ Intelektualnym kłubie i naradžalisia ŭ mianie pytańni.
Prykładam, Viktar Marcinovič u pieraliku biedaŭ, jakija napatkali našu niaščasnuju i dvaistuju Biełaruś, nazvaŭ dva sajuzy piśmieńnikaŭ. Niajasna, u čym biada. U tym, što ich dva, a nie adzin, jak SP BSSR? Ci ŭ tym, što ich nie dvaccać?
Potym Alhierd Bacharevič paśladoŭna prapanavaŭ «prostym ludziam» žyć adpaviedna chryścijanskim kaštoŭnaściam, a potym papiknuŭ «prostych ludziej», što jany nietalerantna staviacca da musulmanaŭ. Jak ateist, u hetym miescy ja adčuła kahnityŭny dysanans.
Ale potym mianie napatkaŭ insajt, bo ja pačuła, što naohuł čałaviek, kaniešnie, pavinien być bieskampramisnym, asabliva kali jon mientalna ź dzievianostych, bo, kali jon idzie na kampramis ź dziaržavaj, heta značyć, što jon joj usio daravaŭ.
Pry hetym, jak vyśvietliłasia, zredku ŭsio ž na kampramis iści možna, bo čałaviek słaby. Adsiul vynikaje, što možna addavać svaje pjesy ŭ dziaržaŭnyja teatry, bo čałaviek słaby, ale nielha chadzić na telebačańnie, bo ty musiš być bieskampramisnym.
«Ništo sabie!» — padumała ja. Vo heta bieskampramisnaść, jakaja mnie padychodzić! Kampramisnaja takaja bieskampramisnaść! Dvaistaja takaja… Chacieła ŭdakładnić ŭ abodvuch duelantaŭ uźnikłyja ŭ mianie pytańni, ale adychodziła apošniaja elektryčka na ̶R̶a̶s̶o̶n̶y̶ Smalavičy, i ja kampramisna pabiehła na jaje, bo doma dzieci, a najaŭnaść dziaciej, akazvajecca, padvyšaje ŭzrovień kampramisu ŭ kryvi:)
Ale ž ja nie zdałasia, nie! Ja vyrašyła bieskampramisna iści na stancyju piecham, kab nie karystacca dziaržaŭnym, znača, transpartam. Dajšoŭšy da stancyi i prykinušy kiłamietraž da Smalavič, ja zrazumieła, što nahi ŭ mianie tolki dźvie i zapasu niamašaka, dyk pryjšłosia pajści na kampramis i sieści ŭ dziaržaŭnuju elektryčku. Tak usio ž chutčej.
Bo zaŭtra ž, joškin kot, ja ranieńka ŭstanu, kampramisna pajdu na svaju dziaržaŭnuju pracu i budu vykładać tam ruskuju movu, usia takaja samotnaja i dvaistaja, jak staronka maja Biełaruś.
Čytajcie taksama: