ZŠA: Madura byŭ hatovy biehčy ź Vieniesueły, ale jaho spynili ruskija
kremlin.ru
Dziaržsakratar Majk Pampiea zajaviŭ, što Nikałas Madura byŭ hatovy biehčy z krainy. «Jaho samalot stajaŭ u aeraporcie, jak ja razumieju, jon hatovy byŭ źjechać siońnia [u aŭtorak] ranicaj, ale ruskija dali zrazumieć, što jon pavinien zastacca», — skazaŭ Pampiea ŭ intervju Si-en-en u aŭtorak.
Taksama, pa słovach pradstaŭnikoŭ Biełaha doma, troje nabližanych Madury spačatku pahadzilisia z dovadami apazicyi ab nieabchodnaści sychodu prezidenta, ale zatym admovilisia ad svaich słovaŭ.
Daradca prezidenta ZŠA pa nacyjanalnaj biaśpiecy Džon Bołtan śćviardžaje, što adzin z hetych čynoŭnikaŭ — ministr abarony Uładzimir Padryna — na praciahu troch miesiacaŭ vioŭ pieramovy z apazicyjaj.
Adnak napiaredadni Padryna ŭ atačeńni vajkoŭcaŭ źjaviŭsia ŭ teleefiry z zajavaj ab padtrymcy Madury.
Taksama Bołtan nazvaŭ hałoŭnaha sudździu Viarchoŭnaha suda Vieniesueły Majkiela Marena i načalnika prezidenckaj achovy Ivana Rafaela Ernandesa Dału.
Pavodle jaho słoŭ, jany pahadzilisia na «mirnuju pieradaču ŭłady ad šajki Madura» Huajdo. «Usie byli zhodnyja, što Madura pavinien syści», — skazaŭ Bołtan.
Daradca Tramp nie pryvioŭ nijakich dokazaŭ, jakija paćviardžajuć namier nabližanych Madury pakinuć jaho. Paźniej z anałahičnymi śćviardžeńniami vystupiŭ śpiecpasłańnik ZŠA ŭ Vieniesuele Elijot Abrams.
Ułady Vieniesueły zajavili, što zadušyli sprobu dziaržaŭnaha pieravarotu pad kiraŭnictvam lidara apazicyi Chuana Huajdo, jaki raniej u aŭtorak abviaściŭ ab pačatku «apošniaha etapu» źviaržeńnia Nikałasa Madury i zaklikaŭ vajskoŭcaŭ pierachodzić na svoj bok. Prezident ZŠA patrabuje ad Kuby vyvieści ź Vieniesueły sałdat, piša Bi-bi-si.