Hamialčuk za 10 hadoŭ zarabiŭ $30 tysiač na pracentach za nielehalnyja pazyki
U Homieli zaviaršyli rasśledavańnie kryminalnaj spravy ŭ dačynieńni da 45-hadovaha miascovaha žychara, raspaviali ŭ Śledčym kamitecie.
Abvinavačany z 2007 pa 2017 hod biez atrymańnia nieabchodnaj licenzii davaŭ pazyki pad pracenty. Bolšaść jaho klijentaŭ źjaŭlalisia naviedvalnikami ihralnych ustanoŭ i brali pazyku, kab adyhracca. Suma pazyki varjiravałasia ad 100 dalaraŭ da 35 tysiač dalaraŭ. Taksama ŭ zakład mužčyna braŭ załaty hadzińnik, juvielirnyja vyraby i aŭtamabili.
Dachod, jaki atrymaŭ działok, acanili ŭ 30 tysiač dalaraŭ.
Akramia hetaha, ustanoŭleny i inšyja złačynstvy, jakija ździejśniŭ zatrymany. Tak, znachodziačysia ŭ adnym z kazino razam sa svaim znajomym, jon adkryta vykraŭ u jaho fiški i prajhraŭ ich u ruletku. Pry čarhovaj sustrečy paśla patrabavańniaŭ paciarpiełaha viarnuć hrošy za fiški abvinavačvany jaho pabiŭ. Vyśvietliłasia, što abvinavačany pabiŭ jašče traich mužčyn.
Taksama adzin z pazyčalnikaŭ doŭhi čas nie moh viarnuć svoj załaty piarścionak, jaki addaŭ abvinavačanamu.
Dziejańni mužčyny kvalifikavanyja śledstvam adrazu pa niekalkich artykułach Kryminalnaha kodeksa: zamach na niezakonnuju pradprymalnickuju dziejnaść, źviazanuju z atrymańniem dachodu ŭ asabliva bujnym pamiery; parušeńnie praviłaŭ ab ździełkach z kaštoŭnymi mietałami; rabavańnie; złosnaje chulihanstva; zaviedama iłžyvy danos.
Majomaść hamielčuka (dva aŭtamabili, dźvie kvatery, skutar) na ahulnuju sumu 185 tysiač rubloŭ aryštavali.
Kryminalnuju spravu pieradali ŭ prakuraturu dla dalejšaha nakiravańnia ŭ sud.