«Budziem źviartacca ŭ Kanstytucyjny sud». Ad arhanizataraŭ mitynhaŭ patrabujuć apłačvać pasłuhi milicyi
«Jość dumka dajści z hetaj historyjaj da Kamitetu pravoŭ čałavieka AAN, bo jana vidavočna dakazvaje, što nijakaja Biełaruś nie pravavaja i nie demakratyčnaja kraina, kali ŭ joj hetak prosta parušajuć prava na svabodu schodaŭ, a sudy heta pakryvajuć», — kaža Ihar Barysaŭ.
Sud Centralnaha rajonu Miensku aštrafavaŭ na 765 rubloŭ staršyniu Biełaruskaj sacyjał-demakratyčnaj partyi (Hramada) Ihara Barysava. Palityka pakarali za admovu apłočvać pasłuhi milicyi padčas śviatkavańnia Dnia Voli 24 sakavika, piša «Radyjo Svaboda».
Tady ŭ Kijeŭskim skvery stalicy adbyŭsia mitynh i śviatočny kancert z nahody 101-ch uhodkaŭ BNR. Ihar Barysaŭ byŭ adnym z zajaŭnikaŭ mierapryjemstva, jakoje pavodle damovy musiła achoŭvać milicyja.
Ale płacić za pasłuhi milicyjantaŭ arhanizatary nia stali, bo ŭ zonie achovy nieviadomyja ŭ cyvilnym biez pryčyny zatrymali dvuch vystupoŭcaŭ, Źmitra Daškieviča i Vitala Rymašeŭskaha. Taksama niekatorych naviednikaŭ milicyjanty zatrymlivali za bieł-čyrvona-biełyja ściahi i symboliku.
Usiaho zajaŭnikaŭ było čatyry:
- Ihar Barysaŭ (staršynia «Hramady»),
- Juraś Hubarevič (lider ruchu «Za svabodu»),
- Volha Kavalkova (sustaršynia BCHD),
- Mikałaj Kazłoŭ (lider AHP).
Kožnaha ź ich u vyniku aštrafavali na 765 rubloŭ (30 bazavych vieličyń).
Jak i inšyja zajaŭniki, Ihar Barysaŭ budzie abskardžvać prysud. Jon dadaŭ, što jahonaja partyja źvierniecca ŭ Kanstytucyjny sud, kab źmianić zakon «Ab masavych mierapryjemstvach».
«Kali na arhanizataraŭ zakon uskładaje adkaznaść, prymušaje ich zaklučać peŭnyja damovy sa słužbami, jakija faktyčna akazvajuć pasłuhi, dyk pavinien być i mechanizm abskardžvańnia hetych pasłuh na vypadak, kali jany nie vykonvajucca. Ale taki mechanizm u zakonie adsutničaje», — adznačyŭ jon.