Redkaje chobi: jak 20-hadovy bieraściejec dapamahaje ŭdaskanalvać karty Jandeksa
Ramanu Maščuku 20 hadoŭ. Jon vučycca na inžyniera ŭ Bresckim palitechu, a ŭ volny čas karektuje karty Jandeksa. Za 4 hady student zrabiŭ bolš za 100 000 pravak i nie tak daŭno atrymaŭ status ekśpierta Narodnaj karty. Navošta jamu heta treba?
Narodnaja karta (NIAK) — servis, jaki dazvalaje karystalnikam ŭnosić abo karektavać abjekty. Paśla prachodžańnia maderacyi novyja ci źmienienyja abjekty adlustroŭvajucca ŭ Jandeks.Kartach, Navihatary, Jandeks.Taksi i inšych dadatkach. Unosić praŭki moža luby zarehistravany karystalnik, ale kab atrymać status ekśpierta, patrebien dośvied.
Raman davoli rana zastaŭsia biez maci. Baćka pracuje pradaŭcom aŭtazapčastak, vychoŭvać syna dapamahali babula i dziadula. Jany i stali pryčynaj, pa jakoj Raman ŭziaŭsia za karty.
«Jašče sa škoły duša lažała da hieahrafii, ale, kali pryjšoŭ čas vyznačycca z budučaj prafiesijaj, daśviedčanyja ludzi padkazali, što ŭ Biełarusi damahčysia pośpiechu ŭ hetaj śfiery davoli składana. Tak ja abraŭ śpiecyjalnaść inžyniera-schiematechnika — amal toje ž, što i prahramist, — tłumačyć Raman. — Adnojčy mnie stała cikava prakłaści maršrut da doma babuli. Akazałasia, što ni doma, ni vulicy, na jakoj jon mieścicca, na karcie niama. Z hetaha i pačałosia majo zachapleńnie kartahrafijaj».
Paśla admaloŭki babulinaj vioski Raman staŭ daśledavać pravilnaść napisańniaŭ rodnaha Bresta. Akazałasia, što niekatoryja abjekty patrabujuć karekciroŭki, asabliva ŭ novych mikrarajonach.
«Ja viedaju, što Jandeks imkniecca da maksimalnaj dakładnaści. Nie zaŭsiody robaty mohuć chutka pa spadarožnikavych zdymkach admalavać miascovaść, byvajuć chiby. Ja i inšyja narodnyja kartohrafy dapamahajem zrabić karty bolš dakładnymi. Roźnica ŭ apieratyŭnaści, — ličyć kartohraf. — Kali byŭ pačatkoŭcam, to šmat čaho nie viedaŭ, sutykaŭsia ź ciažkaściami. Naprykład, namalavaŭ vialiki abjekt, ale niapravilna. Davodziłasia źviazvacca z maderatarami z kampanii abo źviartacca pa dapamohu da bolš daśviedčanych udzielnikaŭ (u nas jość ahulny čat dla karystalnikaŭ i pradstaŭnikoŭ Jandeksa). Praź niejki čas mnie prysvoili status ekśpierta. Ale navat ciapier u niejkich składanych situacyjach kansultujusia z maderatarami».
Siońnia Raman nie tolki ekśpiert pa malavańni, ale i narodny maderatar servisu. Hety status dazvalaje jamu maderavać praŭki inšych karystalnikaŭ na terytoryi, za jakoj jon pryhladaje, navučać i vyroščvać novych ekśpiertaŭ u malavańni.
«Viedaju terytoryju lepš za miascovych»
U volny čas Raman padarožničaje pa Biełarusi i daśleduje rodnyja ŭskrainy.
«Ja starajusia hulać i vyvučać novyja miescy praktyčna kožny dzień, asabliva ŭ vychadnyja. Pračynajusia i starajusia kudyści pajechać na rovary abo elektryčcy, tamu što doma siadzieć — nie varyjant. Za apošnija dva hady unios šmat pravak na karcie Žabinki i Biarozy. Časam miascovyja kažuć, što viedaju terytoryju lepš, čym jany sami».
U płanach na leta ŭ Ramana Maščuka — nanieści na kartu horada Biarozy maršruty i prypynačnyja punkty hramadskaha transpartu. U ideale jašče i z aktualnym raskładam. Dla hetaha małady čałaviek rychtuje zapyt u profilnyja ŭstanovy.
Jakija ŭdakładnieńni ŭnosiacca ŭ karty rukami
Čaściej za ŭsio ŭ pracy z kartami Raman udakładniaje miažy rek i budynkaŭ.
«Časam dla hetaha dastatkova dźviuch siekund. Ale byli i takija praŭki, jakija patrabavali kala dźviuch hadzin. Naprykład, administracyjnyja miežy sielsavietaŭ. U hetym vypadku davodzicca skrupulozna spraŭdžvacca z kadastravymi kartami. Dobra, što jany jość u adkrytym dostupie».
Na dumku Ramana, toje, što narodnyja kartohrafy pracujuć bieź finansavaha ŭznaharodžańnia, dapamahaje abjadnać ludziej, jakim sapraŭdy cikava ŭdaskanalvać karty. Chtości razava ŭnosić praŭki, a dla kahości heta stanovicca chobi.
«Heta prosta treba lubić, hetym prosta treba hareć. Profit — karyść, jakuju ty prynios svaim susiedziam ci zvyčajnym turystam».