Sidorski: Rezkaha rostu cen u Biełarusi dapuščana nie budzie
Rezkaha rostu cen u Biełarusi dapuščana nie budzie. Ab hetym premjer‑ministr Biełarusi Siarhiej Sidorski zajaviŭ siońnia žurnalistam u čas naviedvańnia AAT «Mahiloŭchimvałakno».
Va ŭmovach devalvacyi rasijskaha rubla, ukrainskaj hryŭni, biełaruskaha rubla ceny abjektyŭna pavinny ŭźniacca. «Ale ja jak kiraŭnik urada staju na toj pazicyi, što ceny pavinny ŭličvać nie tolki devalvacyju, ale i adekvatna reahavać na źniešnija rynki, jakija mianiajucca», — zajaviŭ Siarhiej Sidorski. Na źniešnich rynkach ciapier nazirajecca padzieńnie cen na vuhlevadarody ŭ razy. Tamu i pradukcyja vytvorcaŭ‑pierapracoŭščykaŭ hetaj syraviny pavinna tańnieć. Pakul što hetaha nie adbyvajecca, bo jany vypracoŭvajuć resursy dakryzisnaha pieryjadu.
«Ceny pavinny maksimalna reahavać na vykliki rynku. A na rynku idzie źnižeńnie cen na asnoŭnyja syravinnyja resursy, — skazaŭ premjer. — Heta značyć, što padychody, jakija siońnia jość na pavyšeńnie cen, u bližejšaj pierśpiektyvie pavinny viarnucca na svaje miescy».
Ciapier viadziecca pravierka ŭsich rynkaŭ krainy, pradpryjemstvaŭ handlu i hramadskaha charčavańnia. «My pavinny zrabić usio, kab ceny byli abhruntavanyja», — padkreśliŭ Siarhiej Sidorski.
«Z 1 studzienia biahučaha hoda płanavałasia adyści ad rehulavańnia cen, pakinuć tolki karzinu sacyjalnych tavaraŭ, jakija ŭpłyvajuć najbolš aktyŭna na pakupnuju zdolnaść, — rastłumačyŭ kiraŭnik urada. — Ale pakul što heta nie atrymlivajecca». Kali paśla praviedzienych u studzieni pravierak situacyja nie źmienicca, buduć pryniaty «samyja žorstkija miery až da pazbaŭleńnia licenzij, i bolš takich faktaŭ nieabhruntavanaha pavyšeńnia cen być nie pavinna», dadaŭ premjer‑ministr.‑