Va Ukrainie straciŭ voka biełaruski dobraachvotnik: jon vajavaŭ pad pazyŭnym «Hans» i z runami «SS» na šlemie
Va Ukrainie paranieny adzin ź biełaruskich dabraachvotnikaŭ, bieraściejec Dźmitryj Rubašeŭski. Adbyłosia heta 25 maja.
Jak paviedamlajuć jahonyja paplečniki ŭ fejsbuku, u Dźmitryja vybita adno voka, za druhoje zmahajucca daktary. Aproč taho, u jaho množnyja askiepkavyja ranieńni.
Rubašeŭski, fota sa staronki ŭ fejsbuku
Rubašeŭskamu 27 hod. «[U Biełarusi] ŭ mianie była dobraja praca. Ja pačynaŭ hruzčykam, a zatym mianie pieraviali, i ja staŭ vysiakalnikam drukarskaha stanka — my skrynki drukavali», — raskazvaŭ jon.
Dźmitryj vajavaŭ pad pazyŭnym «Hans» — heta adno z samych papularnych niamieckich imionaŭ, u masavaj narodnaj kultury paśla niamieckich našeściaŭ biełarusy nazyvali hety narod «frycami» abo «hansami».
Jak vynikaje z fota ŭ fejsbuku, na kascy «Hansa» namalavany runičny znak «SS» — hvardyi hitleraŭskaj partyi.
«Pavodle palityčnych pohladaŭ ja prychilnik nacyjanał-sacyjalizmu, ale nie hitleraŭskaha, nie niamieckaha. A kab dla ŭsioj Jeŭropy. Usio madernizujecca i nacyjanał-sacyjalizm taksama. Treba, kab usie žyli razam, krainy dapamahali adzin adnamu, nie było impieryjaŭ», — tłumačyŭ Rubašeŭski ŭ intervju «Biełsatu».
Jak paviedamili «Našaj Nivie» biełarusy, jakija vajujuć va Ukrainie, Rubašeŭski pryjechaŭ u 2015-m hodzie, zaachvociŭ jaho Eduard Łobaŭ.