Viciebski školnik dapamoh zatrymać rabaŭnika
Fota abłasnoj milicyi
Padziaku ad viciebskaj milicyi ŭručyŭ siońnia vypuskniku siaredniaj škoły №8 Jaŭhienu Hajko kiraŭnik viedamstva Michaił Hryb. Kab vykanać pryjemnuju misiju, jon naviedaŭ uračystuju liniejku, pryśviečanuju apošniamu zvanku, paviedamlaje pres-słužba abłasnoj milicyi.
Tydzień tamu pa darozie ŭ škołu Jaŭhien staŭ śviedkam dziorzkaha złačynstva. Na maładuju žančynu napaŭ rabaŭnik i pasprabavaŭ adabrać u jaje sumku. Junak, pačuŭšy kryk ab dapamozie, adrazu ž padbieh i pastaraŭsia dać adpor złačyncu. Toj, sustreŭšy aktyŭny supraciŭ, paśpiašaŭsia źbiehčy.
Spałochanaja žančyna vyklikała milicyju. Jaŭhien, dobra zapomniŭšy prykmiety złačyncy, sieŭ u słužbovy aŭtamabil z supracoŭnikami kryminalnaha vyšuku. Abjazdžajučy vulicy i dvary, jon zaŭvažyŭ padobnaha mužčynu na prypynku hramadskaha transpartu. Tak padazravany ŭ ździajśnieńni rabavańnia byŭ zatrymany. Im akazaŭsia raniej sudzimy 38-hadovy tałačyniec.