Pad Maskvoj kaŭkazcy zabili 24-hadovaha śpiecnazaŭca HRU, vieterana vajny ŭ Siryi
24-hadovy eks-śpiecnazaviec rasijskaha HRU Mikita Bialankin vyrašyŭ zastupicca za čałavieka, jakoha źbivali kampanijaj, i sam staŭ achviaraj bojki ŭ Padmaskoŭi. Nie dapamahła ani vajskovaja padrychtoŭka, ani traŭmatyčny pistalet.
Bialankin byŭ vajskoŭcam, słužyŭ u elicie — śpiecnazie HRU. Jon vajavaŭ u Siryi, mieŭ uznaharody za bai ŭ Alepa.
Palicejskija apytali vidavočcaŭ i vyśvietlili, što eks-śpiecnazaviec staŭ udzielnikam adrazu dvuch kanfliktaŭ, pryčym, vierahodna, nie źviazanych pamiž saboj.
Padčas špacyru ź dziaŭčynaj zaŭvažyŭ, jak niekalki mužčyn damahalisia žančynu. Bialankin zrabiŭ im zaŭvahu, paśla čaho ŭ ich pačałasia svarka. Praŭda, u adkryty kanflikt heta supraćstajańnie tak i nie vyliłasia, piša telehram-kanał Baza.
Ale adnačasova z druhoha boku doma pobač ź piŭnym baram pačałasia masavaja bojka — kali heta možna tak nazvać: niekalki mužčyn źbivali chłopca. Bialankin zaŭvažyŭ heta, dastaŭ hazavy traŭmatyčny pistalet z kišeni i pasprabavaŭ spužać chulihanaŭ. Heta nie spracavała, — i jany pieraklučylisia na jaho. U adnaho sa złačyncaŭ byŭ pry sabie nož, — jon udaryŭ im Bialankina ŭ hrudzi, Mikita pamior amal mamientalna. Paśla hetaha napadniki «viarnulisia» da svajoj pieršapačatkovaj achviary, taksama ŭdaryli jaho nažom, a potym źbiehli.
Napadnikaŭ šukajuć — pakul nie zatrymali nikoha. Mužčyna, jakoha źbivali, vyžyŭ. Jon raspavioŭ, što napadnikami byli «niejkija armianie»: jany vyvieli jaho ź siabram z bara, raźviali pa roznych bakach i pačali źbivać. Heta i zaŭvažyŭ Bialankin.
Što stała pryčynaj kanfliktu z «niejkimi armianami», paciarpieły mužčyna nibyta nie pamiataje.