Ciahnik z Homiela prybyŭ u Minsk sa spaźnieńniem na 4 hadziny. Čyhunka tłumačyć heta techničnaj niaspraŭnaściu
«Pasažyrski «Štadler» pa maršrutu Homiel—Minsk 16 červienia raptam spyniŭsia ŭ poli pad Žłobinam. Bryhada mašynistaŭ abviaściła pasažyram, što «pa techničnych pryčynach» treba pačakać», — napisaŭ tielehram-kanał NEXTA.
«Ludzi spaźnilisia na samaloty, ciažarnaja straciła prytomnaść, a pasažyram z maleńkimi dziećmi navat nie prapanavali vady. Pry hetym ludziej naohuł nie infarmavali pra toje, što adbyłosia, a prybiralni i kandycyjaniery nie pracavali — pasažyry ŭručnuju adčyniali dźviery, kab choć ledź-ledź padychać pavietram», — paviedamlaŭ NEXTA.
Viečaram na sajcie BČ situacyju patłumačyli techničnaj niaspraŭnaściu:
«16 červienia ŭ 15 hadzin 57 chvilin elektraciahnik mižrehijanalnych linij biźnies-kłasa №709 Homiel—Minsk spyniŭsia na pierahonie Sałtanaŭka—Chalč pa pryčynie techničnaj niaspraŭnaści. Biełaruskaj čyhunkaj byli pryniaty miery dla likvidacyi niaspraŭnaści i adnaŭleńnia ruchu ciahnika».
U 19 hadzin 57 chvilin ciahnika №709 adpraviŭsia sa stancyi Žłobin. Zatrymka prybyćcia ŭ Minsk skłała 3 hadziny 50 chvilin.
U suviazi z hetym zdareńniem pasažyraŭ, jakija nabyli kvitki na ciahnik № 708 Minsk — Homiel, adpravili pasažyrskimi vahonami łakamatyŭnaj ciahi.
Biełaruskaja čyhunka źviartaje ŭvahu, što 17 červienia pasažyraŭ, jakija nabyli kvitki na elektraciahnik mižrehijanalnych linij biźnies-kłasa № 707 Homiel—Minsk adpraŭleńniem z Homiela ŭ 7.00 paviazuć taksama vahonami łakamatyŭnaj ciahi.
«Biełaruskaja čyhunka prosić u pasažyraŭ prabačeńnia za niazručnaści», — havorycca na sajcie.
Jak paviedamiła TUT.BY čytačka, pasažyram «skazali, što ŭ Minsku na vakzale buduć stajać dziažurnyja z šyldačkami «Aeraport» i «Ryha—Varšava», kab paśpieli tyja, chto śpiašajecca na samalot ci aŭtobus».
Tym, chto zachoča atrymać kampiensacyju, prapanavali źviarnucca ź piśmovaj zajavaj da dziažurnaha pamočnika načalnika vakzała na stancyi «Minsk-Pasažyrski».