Biesprecedentnyja pratesty suprać dyktatury ŭ Kazachstanie: MUS paviedamiła pra 4000 zatrymanych
Za piać dzion mitynhaŭ u Kazachstanie palicejskija zatrymali kala 4 tysiač čałaviek. Pra heta žurnalistam zajaviŭ kiraŭnik MUS krainy Jerłan Turhumbajeŭ, pieradaje Tengrinews.
Mitynhi prachodzili z 9 pa 13 červienia. Pavodle jaho słoŭ, 3 tys. zatrymanych byli «zapratakaliravanyja i vyzvalenyja». Jašče 677 čałaviek pryciahnuli da administracyjnaha aryštu, a 305 — da administracyjnych štrafaŭ.
Turhumbajeŭ adznačyŭ, što palicyi dali kamandu nie ŭžyvać dla strymańnia biesparadkaŭ śpiecsrodki — dubinki i hazavyja bałony. «Užyvałasia tolki fizičnaja siła, kab łakalizavać dadzienyja kanflikty», — skazaŭ jon.
U pres-słužbie viedamstva taksama paviedamili, što ŭ chodzie pratestaŭ kala 300 palicejskich atrymali ranieńni roznaj stupieni ciažkaści, pieradaje NUR.kz. Pa źviestkach viedamstva, pieciarym supracoŭnikam spatrebiłasia miedycynskaja dapamoha. «Usie cialesnyja paškodžańni nanosilisia pałkami, kamianiami i armaturaj, jakija vykarystoŭvali hetyja hramadzianie, što destabilizavali abstanoŭku», — zajaviŭ Turhumbajeŭ.
Niesankcyjanavanyja mitynhi prajšli ŭ haradach Nur-Sułtan i Ałmaty. 9 červienia byli zatrymanyja kala 500 čałaviek. Jany pratestavali suprać niedemakratyčnych vybaraŭ z zahadzia pieradvyznačanym vynikam.