Premiju imia Vasila Bykava pierafarmatujuć
22 červienia na radzimie Vasila Bykava ŭ vioscy Byčki projdzie miemaryjalnaja impreza ŭ honar piśmieńnika. Ale ŭhanaravańnia bykaŭskaj premijaj «Za svabodu dumki» nie budzie. Pra heta Radyjo Svaboda paviedamiŭ zasnavalnik premii Alaksandr Milinkievič.
Pa jaho słovach, naśpieła patreba ŭ pierafarmatavańni premii.
«Užo kali my adznačali 10-hodździe premii imia Vasila Bykava «Za svabodu dumki», razumieli, što jana patrabuje abnaŭleńnia i pierafarmatavańnia, — kaža Milinkievič. — Uznaharoda nie musić być tak ščylna źviazanaja sa mnoj ci rucham «Za svabodu», premija pavinna stać sapraŭdy narodnaj, bo Bykaŭ — heta nie tolki vybitny piśmieńnik, jon adzin z duchoŭnych lidaraŭ nacyi, jaho čaścinka žyvie ŭ kožnym śviadomym biełarusie».
Pavodle Milinkieviča, u hetym hodzie jamu prosta fizična nie ŭdałosia realizavać zadumany płan pierafarmatavańnia.
«U nastupnym hodzie nie tolki byłyja łaŭreaty, a i kožny žychar krainy zmoža paŭpłyvać na vybar naminantaŭ, a paźniej prahałasavać za čarhovaha pieramožcu, — skazaŭ jon. — Tamu dla vyznačeńnia łaŭreata šyroka vykarystajem sacyjalnyja sietki. Padrychtoŭka da cyrymonii ŭručeńnia premii budzie supravadžacca kampanijaj papularyzacyi tvoraŭ i žyćciovych pryncypaŭ Bykava».
U realizacyi prajekta buduć zadziejničanyja roznyja hramadskija inicyjatyvy i arhanizacyi, u tym liku ruch «Za svabodu». U skład rabočaj hrupy, jakaja zaćvierdzić kancepcyju abnoŭlenaj premii Vasila Bykava, uvojduć Śviatłana Aleksijevič, Uładzimier Arłoŭ, Lavon Volski, Źmicier Daškievič, Jury Zisier, Śviatłana Kalinkina, Hleb Łabadzienka dy inšyja.
Adnačasova budzie iści praca, kab zabiaśpiečyć stabilnaść finansavańnia premii, płanujecca dyviersifikacyja jaje krynicaŭ.