Na źjeździe kamunistaŭ pasvarylisia Vaźniak i Kalakin
U pačatku leta adbyŭsia źjezd partyi «Spraviadlivy śviet». Na im staršynioj čarhovy raz byŭ abrany Siarhiej Kalakin. Adnak cikava inšaje, što na źjeździe adbyłasia dyskusija pamiž prychilnikami i praciŭnikami intehracyi z Rasijaj.
Siarhiej Vaźniak. Fota gazetaby.com.
U patrebnaści sajuza z Rasijaj zasumniavaŭsia Siarhiej Vaźniak, kolišni redaktar partyjnaj haziety «Tovariŝ». Vaźniak skazaŭ «NN», što nie ličyć «pucinskuju Rasiju prahresiŭnaj dziaržavaj».
«Heta nie taja dziaržava, jakaja idzie ŭ budučyniu. Kali b prapanavali intehracyju sa Šviejcaryjaj ci Luksiemburham, to ja b padumaŭ. A tak ja baču ŭsiu rasijskuju niespraviadlivaść, chamskaje staŭleńnie da prostych ludziej, niečuvanuju karupcyju, mnie heta nie padabajecca. Nie źjaŭlajecca Rasija siońnia dla mianie pryvabnaj dziaržavaj», — skazaŭ Vaźniak.
Na dumku Vaźniaka, pahłyblenaja intehracyja pryviadzie da taho, što tut tolki mohuć źjavicca «kazaki z nahajkami, kadyraŭščyna, pakiet zakonaŭ Jaravoj, karupcyja». «U nas i svajho dabra chapaje», — adznačyŭ Vaźniak.
Sam Siarhiej Vaźniak vyras u rasijskim Biełharadzie. «Tam moj tata, mahiła mamy, brat ź siamjoj. Ja vyras u Rasii, čałaviek ruskaj kultury, ruskaja mova maja rodnaja», — kaža jon.
U vyniku hałasavańnia bolšaść udzielnikaŭ źjezda padtrymali pazicyi ab dalejšaj intehracyi Biełarusi i Rasii. Niekalki čałaviek usio ž padtrymali i pazicyju Vaźniaka, jon nie byŭ u adzinočku.
Lidar «Spraviadlivaha śvietu» Siarhiej Kalakin kaža, što sajuzny dahavor pamiž Biełaruśsiu i Rasijaj isnuje dziakujučy frakcyi PKB u Viarchoŭnym Saviecie. «Heta vyhadny Biełarusi dahavor, jon absalutna na roŭnyja ŭmovy stavić našy krainy», — pierakanany Kalakin.
«Siońnia 80% ekspartu našaha idzie ŭ Rasiju. Vy chočacie jaho stracić? Stracić hrošy, pracoŭnyja miescy, piensii. Kali vy chočacie, kab Biełaruś zastavałasia niezaležnaj i ekanamična, i palityčna, to nam nieabchodny sajuz z Rasijaj», — miarkuje Kalakin.