Staličnaja fatohrafka sprabavała zabrać syna ŭ byłoha muža ŭ Breście i zakryłasia ŭ mašynie z małym na 14 hadzin
Alena Kuźmič-Łukaševič — fatohrafka ź Minska. Uviečary 25 lipienia jana źjaviłasia ŭ Breście i pasprabavała zabrać syna ŭ byłoha muža.
Pa słovach Uładzisłava, baćki małoha, Alena ŭžo čaćviorty raz sprabuje «skraści dzicia».
Tranślacyju ź miesca padziej viali bresckija błohiery Siarhiej Piatruchin i Alaksandr Kabanaŭ.
Uładzisłaŭ raspavioŭ im, što Alena pryjechała razam ź niejkim svaim siabram: «My byli na vulicy, Alena vychapiła dzicia i zakryłasia ŭ mašynie».
Kali baćka pabieh za imi, siabar Aleny pyrsnuŭ z bałončyka jamu ŭ tvar.
Vyklikali milicyju. Siabra dziaŭčyny zabrali. Sama jana razam z małym zastałasia ŭ mašynie — zakryłasia tam i admoviłasia vychodzić.
Milicyja nibyta paviedamiła, što ničoha nie moža zrabić.
Uład zabłakavaŭ vyjezd Alenie, pačałasia šmathadzinnaja asada. Usiu noč žančyna ź dziciom prasiadzieli ŭ aŭto.
Ranicaj 26 lipienia pryjechali orhany apieki, milicyja, čynoŭniki. Pačalisia pieramovy.
Ahułam u mašynie Alena z synam praviali kala 14 hadzin.
Viarnuŭsia na miesca padziej i siabar Aleny, jakoha zabirała milicyja. Noč mužčyna pravioŭ u adździaleńni, paśla jamu prysudzili štraf za drobnaje chulihanstva, raspavioŭ «Našaj Nivie» błohier Alaksandr Kabanaŭ.
U vyniku i Alena ź siabram i dziciom, i Uład, i čynoŭniki damovilisia, što pajeduć vyrašać pytańnie ŭ administracyju Maskoŭskaha rajona Bresta. U mašynu da Aleny sieŭ adzin z čynoŭnikaŭ, na hetym nastajaŭ Uład, bo bajaŭsia adpuskać žančynu adnu ź dziciom.
Na dumku Ułada, situacyja moža być źviazanaja z sudom — pasiadžeńnie pryznačyli na 6 žniŭnia, na im vyrašycca, z kim zastaniecca chłopčyk. Uład miarkuje, što Alena baicca prajhrać sud, tamu i vyrašyła zabrać dzicia zahadzia.
Alena žyvie ŭ Minsku. U jaje ŭžo jość dačka ad inšaha mužčyny.
Alena pracuje fatohrafam: zdymaje pieravažna vielmi małych dziaciej, niemaŭlat. Joj daviarała fatahrafavać svajo dzicia Łarysa Hrybalova.
Ale ž Uład narakaje na Alenu: pa jaho słovach, jana była prablemnaj maci, nie dahladała dziaciej.
«Naša Niva» źviazałasia z Alenaj, ale jana admoviłasia ad kamientaroŭ.