Kiraŭnik SK raskazaŭ niekatoryja padrabiaznaści samahubstva mahiloŭskaha daišnika
Fota Nadziei Bužan
Hienieralnaja prakuratura vyvučaje spravu pra samahubstva supracoŭnika DAI ŭ Mahilovie. Pra heta paviedamiŭ siońnia žurnalistam staršynia Śledčaha kamiteta Ivan Naskievič, piša BiełTA.
«Prezidentu paviedamlena ab pryniaćci śledstvam kančatkovaha rašeńnia ab spynieńni kryminalnaj spravy pa fakcie vyjaŭleńnia trupa supracoŭnika milicyi Patapoviča. U śledstva niama sumnievu ŭ tym, što mieła miesca samahubstva, dokazaŭ tamu šmat, — zajaviŭ Ivan Naskievič.
— Kryminalnaja sprava spynienaja i znachodzicca na vyvučeńni Hienieralnaj prakuratury dla dačy acenki zakonnaści rašeńniaŭ, pryniatych śledstvam».
Śledčyja dakazali, što ŭ dzień samahubstva lejtenant DAI z Mahilova kupiŭ u kramie drovy i srodki dla raspalvańnia, jakija zahadzia dastaviŭ na miesca zdareńnia. Padčas dziažurstva jon pa nadumanych padstavach syšoŭ z maršrutu niasieńnia słužby, pieraapranuŭsia ŭ cyvilnaje i na taksi źjechaŭ u les.
«Da niadaŭniaha času nam nie chapała adnaho źviana — taksista, jaki vioz supracoŭnika milicyi. My jaho znajšli, dapytali. Jon daŭ pakazańni, jakija znachodziacca ŭ kanvie ŭsich astatnich dokazaŭ», — raspavioŭ kiraŭnik viedamstva.
Toje, što supracoŭnik DAI sam sieŭ u mašynu taksi, paćviardžajuć zapisy z kamier nazirańnia, tamu pra vykradańnie havorka nie viadziecca.
«Pa zaklučeńni ekśpiertyzy, jon moh sam sabie pryčynić toje ahniastrelnaje ranieńnie, jakoje stała pryčynaj śmierci. Na pistalecie znachodziacca tolki jaho bijałahičnyja ślady, na ciele vyjaŭlenyja ślady strełu. Heta śviedčyć ab tym, što streł zrobleny ź blizkaj adlehłaści, heta značyć, mahčyma, na adlehłaści svajoj vyciahnutaj abo nabližanaj ruki», — skazaŭ Ivan Naskievič.