Ukrainski «Naftahaz» pačaŭ impart dyzpaliva i elektraenierhii ź Biełarusi. Zialenski damoviŭsia z Łukašenkam?
Hrupa «Naftahaz» upieršyniu impartavała ź Biełarusi partyju naftapraduktaŭ dla ich prodažu na ŭkrainskim rynku. Pra heta havorycca ŭ paviedamleńni ŭkrainskaj dziaržkampanii, adznačaje tut.by.
— U vieraśni my pastavim na ŭkrainski rynak 30 tys. ton dyzielnaha paliva vytvorčaści Mazyrskaha NPZ. Realizujem hetyja abjomy razam z palivam ułasnaj vytvorčaści. U dalejšym płanujem aktyŭna raźvivać kirunak trejdzinhu, bo pytańni resursnaha napaŭnieńnia rynku Ukrainy i dyviersifikacyi krynic pastavak vielmi aktualnyja, — adznačyŭ kiraŭnik dyvizijona «Nafta» hrupy Naftahaz Mikałaj Haŭrylenka.
Za košt realizacyi impartnaj dyzpaliva hrupa Naftahaz pavialičyć svaje prodažu hetaj pradukcyi ŭ vieraśni bolš, čym u dva razy. Heta akaža pazityŭny ŭpłyŭ na rynak, uličvajučy deficyt dyzpaliva va Ukrainie ŭ vieraśni-kastryčniku.
Napružanaść na ŭkrainskim rynku dyzpaliva paŭstała z-za prypynieńnia prapampovak pa naftapraduktapravodzie «PrykarpatZachadtrans» i składanaściami z pastaŭkami impartnaha paliva pa čyhuncy i pa mory. Niadaŭna Ukraina ŭviała śpiecyjalnuju pošlinu na impart dyzpaliva rasijskaj vytvorčaści pa hetym trubapravodzie, jaki kantralujuć struktury, źviazanyja z asiarodździem «kuma Pucina» Viktara Miedviedčuka i biełaruskim biznesmenam Mikałajem Vierabjom.
Adnak nie tolki biełaruskim dyzielem zacikaviŭsia «Naftahaz». Na minułym tydni kampanija paviedamiła ab pačatku pastavak biełaruskaj elektraenierhii i jaje prodažy na ŭkrainskim rynku.
- Hrupa «Naftahaz» vykarystoŭvaje ŭsie mahčymaści, kab prapanavać klijentam enierhietyčnyja pradukty na najlepšych umovach. U pryvatnaści, my dyviersifikujem zakupki elektraenierhii, pačali jaje impart pa doŭhaterminovym kantrakcie z «Biełenierha», - adznačyŭ dyrektar pa intehravanym hazavym biźniesie «Naftahaza» Andrej Favoraŭ.
U «Biełenierha» skazali TUT.BY, što z 20 pa 30 vieraśnia pastaŭki elektraenierhii va Ukrainu pa dadzienym kantrakcie z «Naftahazam» viaducca ŭ testavym režymie.
Ułady Ukrainy adkryli impart elektraenierhii, kab źnizić manapoliju kampanii DTEK aliharcha Rynata Achmietava, jakaja zajmaje na rynku dvuchbakovych dahavoraŭ 70%. Kankurencyja pavinna padšturchnuć ceny ŭniz.
Pradstaŭnik prezidenta Ukrainy ŭ Kabiniecie ministraŭ Andrej Hierus rastłumačyŭ, što admiena zabarony na prodaž biełaruskaj elektraenierhii pa dvuchbakovym dahavorach źjaŭlajecca tolki pieršym krokam na šlachu da demanapalizacyi enierharynku. I radykalna paŭpłyvać na košt elektryčnaści hetaja miera nie zmoža, bo ŭsie dastupnyja abjomy ź Biełarusi ŭžo pastupajuć na rynak «na sutki napierad». U pierśpiektyvie pastaŭki elektryčnaści va Ukrainu ź Biełarusi, jak ličyć Hierus, mohuć uzraści tolki niaznačna - ź ciapierašnich 100-300 młn kVt ∙ č da 200-500 młn kVt ∙ č.
Udzielniki enierhietyčnaha rynku Ukrainy nazyvajuć novyja kantrakty «Naftahaza» ź Biełaruśsiu prykładami ŭdałaha biźniesu. Pa ich słovach, kuplać enierhanośbity ŭ Biełarusi ciapier vyhadna. Ekśpierty nahadali, što nie tak daŭno Uładzimir Zialenski hutaryŭ pa telefonie z Alaksandram Łukašenkam i prasiŭ padtrymki. Pa ich słovach, paśla prykładu «Naftahaza» buduć i inšyja. «U presie heta moža padajecca jak baraćba ŭłady z aliharchami. Ale nie varta zabyvać, što va Ukrainu viarnuŭsia [aliharch Ihar] Kałamojski, «sponsar» pieramohi Zialenskaha, i jon taksama zacikaŭlenaja asoba, taksama hulec», - skazaŭ TUT.BY udzielnik enierhietyčnaha rynku Ukrainy.