Kaardynatary štaboŭ FBK u Rasii paviedamili pra novyja pieratrusy ŭ rehijonach
U byłych i ciapierašnich supracoŭnikaŭ i vałancioraŭ rehijanalnych štaboŭ Fondu baraćby z karupcyjaj (FBK) z ranicy ŭ aŭtorak, 15 kastryčnika, prachodziać pieratrusy. Pra heta na svajoj staroncy ŭ Twitter paviedamiŭ dyrektar FBK Ivan Ždanaŭ, piša RBK.
Pavodle jaho słoŭ, havorka idzie pra bolš čym dziasiatak haradoŭ, uklučajučy Jekaciarynburh, Ufu, Samaru, Varoniež, Čelabinsk, Novasibirsk i Jarasłaŭl. Ždanaŭ śćviardžaje, što pieratrusy źviazanyja sa «spravaj FBK» — kryminalnym razhladam u dačynieńni fondu pa artykule ab admyvańni hrošaj.
Juryst štaba FBK va Ufie Fiodar Cielin paviedamiŭ RBK, što «pieratrusy ŭ štabie zaraz nie pravodziacca, pravodziacca ŭ troch vałancioraŭ doma». Pavodle jaho słoŭ, supracoŭniki pravaachoŭnych orhanaŭ pryjšli da aktyvistaŭ kala 8 ranicy i da hetaha času pravodziać śledčyja dziejańni. U pres-słužbie HU MUS pa Baškartastanie RBK zajavili, što «ustrymlivajucca ad kamientaroŭ» z nahody pieratrusaŭ.