Dyrektarka «Biełsata» adkazvaje Prejhiermanu: Vašy słovy stvarajuć jašče adno ŭražańnie falšyvaści abvieščanaha «dyjałohu»
U intervju «Našaj Nivie» biełaruski palitołah Jaŭhien Prejhierman vykazaŭ pretenzii da raboty telekanała «Biełsat» na adnym z forumaŭ «Minski dyjałoh» i patłumačyŭ, čamu arhanizatary spynili supracoŭnictva ź im. Ahnieška Ramašeŭskaja-Huzy, dyrektarka, hałoŭnaja redaktarka telekanała «Biełsat», napisała list redakcyi «Našaj Nivy», u jakim tłumačyć svaju pazicyju.
Čytajcie: «Biełaruś tolki jak «apošniaja dyktatura Jeŭropy»? Absalutnaja fihnia». Vialikaja hutarka ź Jaŭhienam Prejhiermanam
«Adnosna śćviardžeńniaŭ Jaŭhiena Prejhiermana, vykazanych u artykule «Biełaruś tolki jak «apošniaja dyktatura Jeŭropy»? Absalutnaja fihnia». Vialikaja hutarka ź Jaŭhienam Prejhiermanam ad 16 kastryčnika, chaču źviarnuć vašuju ŭvahu na nastupnaje:
«Brud»
List, jaki nibyta byŭ adrasavany mnie, nie trapiŭ da mianie asabista, a byŭ pieradadzieny praz pasiarednikaŭ. Niahledziačy na toje, ja adkazała na hety list. Nie było ŭ maim adkazie nijakaha «brudu», pra jaki havorycca ŭ artykule. List utrymlivaŭ źmiastoŭnyja adkazy na śćvierdžańni dy abvinavačańni Jaŭhiena Prejhiermana na adras kanału.
«Pobač i nie siadu»
U kožnaj demakratyčnaj dziaržavie miedyi majuć bieśpieraškodny i roŭny dostup da infarmacyi. Tolki ŭ niedemakratyčnych dziaržavach, padčas dyktaturaŭ, abmiažoŭvajecca prava miedyjaŭ na dostup da infarmacyi dy ŭžyvajecca cenzura — tym samym hramadskaja dumka pazbaŭlajecca fundamientalnaha prava dostupu da abjektyŭnaj i dakładnaj infarmacyi. Hetaje prava nie abmiažoŭvajecca nijakimi inšymi ŭmovami, pry jakich miedyi abaviazanyja infarmavać pra peŭnuju padzieju ŭ «pazityŭnym» ci ŭ «niehatyŭnym» śviatle. Miedyi majuć abaviazak być praŭdzivymi dy abjektyŭnymi. Jany majuć taksama prava davać kamientary i vykazvać mierkavańni. Hetaje prava nie pavažajecca ŭ Biełarusi. Niezaležnyja miedyi, siarod jakich i «Biełsat», rehularna zaznajuć represii, a ŭ pryvatnaści nam uvieś čas ź niezrazumiełych pryčynaŭ admaŭlajuć u akredytacyi. Tym bolš słovy Jaŭhiena Prejhiermana, što z «Biełsatam» «pobač i nie siadu», stvarajuć jašče adno ŭražańnie falšyvaści abvieščanaha «dyjałohu». Dyjałoh praduhledžvaje mienavita hatoŭnaść sieści razam, praciahvańnie ruki nasustrač, adkrytaść razmovam, inšym pohladam, krytycy i abmienu arhumientami.
«Biełsat» jość i zastaniecca hatovym da taho, kab siadać razam i razmaŭlać. My zastajemsia adkrytyja krytycy, adnak zachoŭvajem za saboju prava vykazvać mierkavańni».