U Hrodnie ad mieninhitu pamior student. Jašče troch studentak zabrali ŭ špital
Studentu Hrodzienskaha ŭniviersiteta imia Janki Kupały stała błaha padčas pierapynku ŭdzień 24 kastryčnika. Jašče troch studentak zabrali ŭ špital. Śmierć A. ad mieninhitu Svabodzie paćvierdzili niekalki studentaŭ.
U Ministerstvie achovy zdaroŭja Svabodzie taksama paćvierdzili śmierć studenta — papiarednie, ad vostraj formy meninhitu.
«U Hrodna terminova vyjechaŭ hałoŭny śpiecyjalist pa infiekcyjnych chvarobach Minzdaroŭja prafiesar Ihar Karpaŭ. Adnak dakładna kazać ab pryčynie śmierci pakul rana. Što tyčycca špitalizacyi astatnich, heta zvyčajnaja praktyka — abśledavać usich, chto byŭ u kantakcie z pamierłym», — patłumačyła pres-sakratarka Ministerstva zdaroŭja Julija Baradun. Letaś ad vostraj formy mieninhitu ŭ Biełarusi pamierli 6 čałaviek.
A. było 19 hadoŭ. Jon vučyŭsia na fizika-techničnym fakultecie.
Siabry, jakija bačyli jaho ŭ apošnija dni, kažuć, što chłopiec nia skardziŭsia na stan zdaroŭja. Napiaredadni śmierci, 23 kastryčnika, jon hulaŭ u baskietboł. Rankam 24 kastryčnika taksama nie vyklikaŭ padazreńniaŭ, što chvareje.
«U niejki momant jon prosta ŭpaŭ, i ŭsio. Nie stała jaho… Jon byŭ tavaryskim. I prosta ŭ adzin momant chop — i jaho niama», — kaža siabar Sašy.
Usio adbyłosia padčas pierapynku ŭ adnym z karpusoŭ univiersiteta.
Pra toje, što pryčynaj śmierci staŭ mieninhit, studentam skazaŭ dekan fakulteta. Da taho ž błaha stała jašče trom dziaŭčynam, ich zabrali ŭ špital. Ci paćvierdziŭsia ŭ ich taki ž dyjahnaz, nieviadoma.
Studentam 2 i 3 kursaŭ abjavili, što 25 kastryčnika da ich pryjedzie miedycynskaja kamisija, kab uziać analizy na najaŭnaść mieninhakokavaj infiekcyi.
Pa słovach adnaho sa studentaŭ, moładź napałochanaja i płanuje nie iści ŭ piatnicu na pary. Ale pra karancin va ŭniviersitecie pakul havorki nie išło.
Raźvitańnie z pamierłym adbudziecca 26 kastryčnika.