Mitrapalit Tadevuš Kandrusievič: Kaścioł adkryty dla dušpastyrstva ludziej z homaseksualnaściu
Padčas pastyrskaj sustrečy duchavienstva i kansekravanych asobaŭ Minščyny, jakaja prachodziła 24 kastryčnika ŭ Čyrvonym kaściole, arcybiskup Tadevuš Kandrusievič vykazaŭsia pra mahčymaść śpiecyjalnaha dušpastyrstva ludziej z homasieksualnaściu ŭ Kaściole na Biełarusi, paviedamlaje catholic.by.
Jak zaznačyŭ pry hetym arcypastyr, padobnyja inicyjatyvy ŭžo daŭno isnujuć u śviecie. Śpiecyjalnaje dušpastyrstva dla ludziej z homasieksualnaściu, jakoje pravodzicca ŭ mnohich kaściolnych supolnaściach za miažoj, maje na mecie nie stvaryć niešta nakštałt «reziervacyi», a naadvarot, vyjści nasustrač ludziam, jakija adčuvajuć siabie najbolš biezabaronnymi pierad abliččam składanaj žyćciovaj situacyi.
Hetaja inicyjatyva nijakim čynam nie supiarečyć tamu, što Kaścioł na Biełarusi paśladoŭna ŭ duchu Jevanhiella vystupaje ŭ abaronu stvoranaha Boham instytutu siamji i aktyŭna padtrymlivaje skiravanyja na heta hramadskija inicyjatyvy.
Havoračy na poŭny hołas pra niedapuščalnaść raspaŭsiudžvańnia hiendarnaj ideałohii i asabliva ŁHBT-prapahandy siarod padrastajučaha pakaleńnia, Kaścioł pry hetym nijakim čynam nie sprabuje šalmavać, styhmatyzavać ci adšturchnuć ad Chrysta i Jaho lubovi nivodnaha čałavieka.
Jak zaznačyŭ na sustrečy staršynia Ekśpiertnaj rady pa pytańniach žyćcia i siam'i pry Minska-Mahiloŭskaj archidyjacezii ks. prełat Andrej Steckievič, nazyvajučy pa imieni hrech i asudžajučy jaho, Kaścioł nie asudžaje ludziej, kab nie zhubić samoha čałavieka. Navat leksika Kaścioła ŭ hetaj śfiery, kali havorka idzie pra ludziej z homasieksualnaściu abo z zaležnaściu, pieradusim padkreślivaje hodnaść čałaviečaj asoby, stvoranaj na vobraz i padabienstva Božyja.
Śviatar nahadaŭ, što ŭ našaj krainie ŭžo daŭno paśpiachova dziejničaje dušpastyrstva ludziej z zaležnaściami. Hrupy samadapamohi nakštałt Ananimnych ałkaholikaŭ dziejničajuć pry mnohich katalickich parafijach, dapamahajučy sotniam ludziej štodzionna krok za krokam zmahacca sa złom, u pastku jakoha jany trapili. Dziakujučy hetamu vielmi mnohija, u tym liku niekatoliki i navat niavierujučyja, adkryvajuć sapraŭdny sens i radaść žyćcia ŭ svabodzie ad zhubnaha zła i viartajuć sabie kantrol nad saboju.
Padobnym čynam moža dziejničać taksama dušpastyrstva ludziej z homasieksualnaściu, jakija žadajuć žyć u zhodzie z Božym zakonam i sa svaim sumleńniem.
Kali inicyjatyva śpiecyjalnaha dušpastyrstva ludziej z homasieksualnaściu patrabuje hruntoŭnaj raspracoŭki i padrychtoŭki, užo siońnia katalickija śviatary hatovyja pryniać kožnuju takuju asobu i dać nieabchodnyja duchoŭnyja rekamiendacyi.